Hjörvar um mistök Alisson: Ef þú ætlar að gera stór mistök veldu þá réttu augnablikin

Messan tók fyrir markið sem Liverpool fékk á sig á móti Leicester City í ensku úrvalsdeildinni um helgina.

Fyrsta markið sem Liverpool fékk á sig á leiktíðinni var ansi slysalegt og markvörðurinn sem var búinn að halda hreinu í þremur fyrstu leikjum sínum í ensku úrvalsdeildinni gerði þar stór mistök.

„Þeir eru í basli upp á miðjum vellinum með boltann og ofan á það kemur léleg sending til baka frá Van Dijk,“ sagði Brynjar Björn Gunnarsson og svo var komið að tilþrifum Alisson Becker sem í stað þess að sparka boltanum í burtu reyndi að sóla sóknarmann Leicester á endalínunni.

Alisson Becker tapaði boltanum og Leicester skoraði í tómt markið.

„Ég las nú einhvern tímann tölfræði að hann hafi ekki gert nein mistök í deild í fyrra sem hafi kostað mark,“ sagði Hjörvar Hafliðason en hvað með þessu mistök?

„Þeir vilja vera með svona markmann og vilja vera með markmann sem spilar fótbolta. Þetta er bara hans leikur og þeir vilja að hann haldi áfram að vera eins og hann er,“ sagði Hjövar.

„Þú sást ekki Bruce Grobbelaar standa á marklínunni í fyrirgjöfum. Hann fór bara út og stundum klikkaði það,“ sagði Hjörvar.

„Þetta er búið að kosta þá eitt mark í fjórum leikjum. Ef þetta fer að kosta þá tvö, þrjú og fjögur mörk yfir tímabilið þá gæti þetta orðið mjög dýrt fyrir Liverpool,“ sagði Brynjar Björn.

„Er þetta að vera með of mikið sjálfstraust,“ spurði Ríkharð Guðnason, umsjónarmaður Messunnar.

„Nei, þetta er bara léleg ákvörðunartaka,“ sagði Brynjar Björn en Hjörvar taldi að þetta gæti líka hafa verið stress.

„Það er betra að gera mistök 2-0 yfir en í stöðunni 0-0. Það er eins og Hugo Lloris gerði ein fyndnustu mistökin í sögu heimsmeistaramótsins. Það man enginn eftir því vegna þess að hann gerði þau í stöðunni 4-1 í úrslitaleiknum. Ef þú ætlar að gera stór mistök veldu þá réttu augnablikin í það,“ sagði Hjövar.

Það má finna alla umfjöllun Messunnar um mistök Alisson Becker hér fyrir neðan.