Guðbjörg og Ingibjörg héldu hreinu │Svava Rós á skotskónum

Guðbjörg Gunnarsdóttir og Ingibjörg Sigurðardóttir héldu marki sínu hreinu í síðasta leiknum fyrir landsleikjahlé í sænsku úrvalsdeildinni.

Djurgarden fékk Kalmar í heimsókn og voru Guðbjörg og Ingibjörg á sínum stað í byrjunarliði Djurgarden. Julia Spetsmark skoraði tvisvar fyrir Djurgarden í fyrri hálfleik og þar við sat. Lokatölur 2-0.

Anna Björk Kristjánsdóttir og Rakel Hönnudóttir töpuðu 0-2 þegar lið Gautaborgar kom í heimsókn til LB 07. Íslensku landsliðskonurnar spiluðu báðar allan leikin fyrir LB.

Svava Rós Guðmundsdóttir skoraði seinna mark Röa í sigri á Stabæk í norsku úrvalsdeildinni.

Ina Skaug kom Röa yfir strax á annari mínútu áður en Svava Rós tryggði sigurinn í uppbótartíma seinni hálfleiks.

Allar fimm eru í íslenska landsliðshópnum fyrir leikina mikilvægu gegn Þýskalandi og Tékklandi í byrjun september.