Flóttamaður, sem fékk hæli á Íslandi vegna ofsókna sem hann varð fyrir sem transmaður, er skráður sem kona á á þeim skilríkjum og pappírum sem hann fékk frá Útlendingastofnun. Hann segir Útlendingastofnun hafa neitað að aðhafast nokkuð í málinu og vísa á Þjóðskrá.

Reykjavík Grapevine greindi fyrst frá máli Prodhi Manisha á dögunum. Útlendingastofnun samþykkti hælisumsókn hans fyrst og fremst á þeim forsendum að hann væri transmaður. Á meðan Prodhi hafði stöðu hælisleitanda var hann skráður sem karlmaður og fékk íslensk skilríki sem sýndu það sama.

Honum brá því heldur betur í brún þegar hann fór að sækja nýju skilríkin sem staðfesta að hann hafi hlotið hæli hér á landi. Á þeim stendur skýrum stöfum að hann sé kona.

„Þau fóru bara eftir því sem stóð í vegabréfinu,“ segir Prodhi. „Þau sögðu að þar sem ég væri skráður sem kona í vegabréfi frá heimalandi mínu gætu þau ekkert gert. Þau sögðu að Útlendingastofnun gæti ekki breytt kyni fólks og að það hafi hreinlega verið mistök að skrá mig sem karl þegar ég sótti upphaflega um hæli.“

„Þau eru að segja transmanneskju að sú ákvörðun að skrá þeirra rétta kyn hafi verið mistök! Þar fyrir utan eru staðreyndavillur í þeirri yfirlýsingu sem mér barst,“ segir Prodhi.

„Ég veit til þess að aðrir hælisleitendur, sem eru trans og voru að flýja staði þar sem slíkt er ekki viðurkennt, hafi fengið að skrá sitt rétta kyn á Íslandi þrátt fyrir að hafa komið til landsins með vegabréf sem sagði annað. Samt fengu þau strax rétta skráningu en ekki ég.“

Prodhi segist vita til þess að Útlendingastofnun hafi áður skráð rétt kyn transfólks og mun því leita réttar síns með aðstoð lögfræðings og mannréttindasamtaka.

„Ég er í sambandi við Samtökin 78, Trans-Ísland, Amnesty International og flóttamannahjálp Sameinuðu þjóðanna.“