Herrera gæti fengið fangelsisdóm og sex ára bann frá fótbolta

Ander Herrera gæti þurft að sitja í fangelsi ásamt því að fara í sex ára bann frá fótbolta verði hann fundinn sekur um hagræðingu úrslita.

Saksóknarar á Spáni fara fram á tveggja ára fangelsisvist og sex ára bann frá fótbolta fyrir alla 36 leikmennina sem eru viðriðnir hagræðingarmál sem er í ferli hjá dómstólum í Valencia.

Fyrir fyrsta brot sleppa menn oftast við fangelsisvist á Spáni ef þeir eru bara dæmdir í tveggja ára fangelsi, en lögfræðingar La Liga deildarinnar hafa farið fram á að dómurinn verði lengdur í fjögur ár í fangelsi ef leikmennirnir verða dæmdir sekir.

Leikurinn sem um ræðir er viðureign Real Zaragoza, sem Herrera spilaði fyrir, og Levante í maí 2011. Zaragoza vann leikinn 2-1 og þau úrslit þýddu að Deportivo La Coruna féll úr deildinni.

Herrera hefur áður sagt að hann sé saklaus í þessu máli.

„Eins og ég sagði árið 2014, þegar málið kom fyrst upp, þá hef ég aldrei og mun aldrei koma nálægt hagræðingu úrslita,“ sagði hann fyrr í febrúarmánuði.

„Ef ég verð kallaður fyrir dómstóla þá mun ég glaður fara því ég hef ekkert að fela. Ég elska fótbolta og trúi á heiðarleika gagnvart leiknum, innan vallar sem utan.“

Réttarhöld í málinu eiga að hefjast á næsta ári. Spænskir fjölmiðlar telja að alls tengist 42 manns málinu sem allir eigi á hættu að verða dæmd fangelsisvist.