Guardiola gleymdi vegabréfinu

Sem kunnugt er mætir Manchester City West Ham í æfingaleik á Laugardalsvelli á morgun.

City-liðið er núna á leiðinni til Íslands en litlu munaði að Pep Guardiola, knattspyrnustjóri City, missti af fluginu. Spánverjinn gleymdi nefnilega vegabréfinu sínu. Mirror greinir frá.

Þegar City-liðið mætti út á flugvöllinn í Manchester fann Guardiola vegabréfið sitt hvergi. Spænski stjórinn leitaði í farangri sínum og í liðsrútunni í góðan hálftíma.

Guardiola áttaði sig svo á því að vegabréfið hefði orðið eftir heima. Því var á endanum skutlað til hans og Guardiola gat því farið með liðinu sínu til Íslands.

Leikurinn á Laugardalsvelli verður fjórði og síðasta leikur City á undirbúningstímabilinu. Leikurinn hefst klukkan 14:00.

City og West Ham verða bæði með blaðamannafundi í dag og mun Vísir fylgjast með gangi mála á þeim.