Shaw bakkaði á Jones

Það gengur ekkert upp hjá Luke Shaw, leikmanni Manchester United, þessa dagana.

Í síðasta mánuði bakkaði Shaw Ranger Rover jeppa sínum á Bentley-bíl Phil Jones, samherja síns, á Carrington, æfingasvæði United.

Heimildarmaður The Sun segir að enginn hafi meiðst og litlar skemmdir hafi orðið á bílunum. Því fylgdi líka sögunni að Shaw hafi að sjálfsögðu efni á að borga viðgerðina.

Shaw er ekki í náðinni hjá José Mourinho, knattspyrnustjóra United, og hefur aðeins spilað tvo leiki á tímabilinu. Hvorugur þeirra var í byrjunarliði.

Shaw kom til United frá Southampton sumarið 2014. Líklegt þykir að hann yfirgefi félagið fyrr en síðar.