Gagnrýni mannréttindanefnda stungið undir stól

Niðurstöður mannréttindanefnda Sameinuðu þjóðanna hafa hvorki verið þýddar né birtar af hálfu íslenskra stjórnvalda árum saman. Þetta stríðir gegn tilmælum nefndanna sjálfra. Nefndirnar starfa á grundvelli mannréttindasamninga sem Ísland á aðild að og er aðildarríkjum skylt að eiga regluleg samskipti við þær um stöðu mannréttindaverndar á ýmsum sviðum. 

Í kjölfar samskiptanna birta nefndirnar niðurstöður með ábendingum til stjórnvalda. Nefndirnar mælast til þess að ríkið þýði niðurstöðurnar og samskiptin á íslensku og kynni rækilega fyrir almenningi í gegnum opinberar vefsíður, fjölmiðla og frjáls félagasamtök. 

Í tilefni af fyrirspurn Fréttablaðsins var gerð leit í dómsmálaráðuneytinu að íslenskum þýðingum skjalanna og birtingu þeirra á vef ráðuneytisins. Sú leit bar ekki árangur. Þetta staðfestir Jóhannes Tómasson, upplýsingafulltrúi ráðuneytisins, og segir ekki miklu púðri hafa verið eytt í þýðingar í gegnum árin.