Albert: Besta frammistaðan til þessa

Albert Guðmundsson segir mínúturnar sem hann spilaði í kvöld hafi verið þær bestu í aðalliði PSV.

Albert kom inn á sem varamaður á 69. mínútu í 4-1 sigri PSV á Venlo í hollenska bikarnum í kvöld. Þetta var í fyrsta skipti í næstum tvo mánuði sem Albert fær mínútur með aðalliðinu, en hann hefur verið að spila vel með varaliðinu.

„Þetta er ekki alveg að fara eins og ég hefði viljað, en ég er að gera mitt besta,“ sagði Albert í viðtali við hollenska fjölmiðla eftir leikinn.

„Ég hef engann rétt á því að kvarta á meðan liðið vinnur í hverri viku.“

Albert hefði getað skorað í kvöld, en í stað þess að skjóta sjálfur gaf hann boltann á Gaston Pereiro. „Hann var í góðri stöðu. Ef ég væri að spila með varaliðinu hefði ég kannski skotið sjálfur,“ sagði Albert léttur í lund.