Úkraínskur hönnuður skreytti íslenska stjórnarsáttmálann

„Ég fékk verkefnið á mánudag og það komu mjög margir að því hér hjá okkur,“ segir Viktoria Buzukina, grafískur hönnuður á auglýsingastofunni Hvíta húsinu en myndir eftir hana skreyta nýjasta stjórnarsáttmálann sem er 40 blaðsíður.

Viktoria hefur verið búsett hér á landi í sjö ár og er ánægð með hvernig til tókst.

Forsíðan á sáttmálanum hefur vakið töluverða athygli en þar er sem nýtt skjaldarmerki birtist, sem Guðmundur Bernharð, listrænn stjórnandi, þó þvertekur fyrir. 

„Þetta er ekki skjaldarmerkið heldur vitnun í skjaldarmerkið. Við fengum leyfi frá aðilum á vegum ríkisins til að gera þetta svona. Við pössuðum að fá leyfi fyrir öllu og bárum þetta undir fólk. Við leggjum áherslu á að þetta er ekki skjaldarmerkið en að landvættirnar séu til staðar og við vitnum í merkið sjálft. En við erum ekki að sýna skjaldarmerkinu óvirðingu,“ segir hann.

Allur stjórnarsáttmálinn er unninn innanhúss hjá stofunni en umbrotið og annað smálegt þykir sérlega smekklega gert, í ljósi þess stutta tíma sem stofan fékk til að vinna hana. Sjö stórar myndir prýða sáttmálann sem lítur bæði vel út í orði og á borði. 

Að neðan má sjá fleiri skreytingar úr sáttmálanum.