Námsgögn verða keypt af eiginmanni formanns skólanefndar

„Ég kom ekki nálægt þessu. Auðvitað er svona alltaf óheppilegt, ég játa það, en ég hef aldrei komið nálægt ritfangakaupum skólans eða bæjarins,“ segir Sigrún Edda Jónsdóttir, formaður bæjarráðs og skólanefndar Seltjarnarnesbæjar. Í vor samþykkti skólanefndin að kaupa inn helstu námsgögn fyrir börn í 1. – 6. bekk Mýrarhúsaskóla. Um er að ræða blýanta, strokleður, yddara, skæri, lím og annað sem metið var sem svo að væri kostnaðarsamt á innkaupalista skólans samkvæmt upplýsingum frá Ásgerði Halldórsdóttur bæjarstjóra. Foreldrar og forráðamenn barnanna þurfa þó enn að kaupa stílabækur og plastmöppur en börn í 7. –10. bekk við Valhúsaskóla njóta ekki þessarar niðurgreiðslu. Tugir skóla hafa að undanförnu ákveðið að greiða námsgögn fyrir grunnskólabörn í vetur.

Sigrún Edda segir skólann hafa komið með tillögu í vor um að greiða hluta námsgagna yngri bekkjanna. Hún hafi verið samþykkt samhljóða í skólanefnd og skólastjórnendum falið að útfæra það. „Síðan hef ég ekki komið nálægt málinu.“

Þorgerður Anna Arnardóttir, aðstoðarskólastjóri grunnskóla Seltjarnarness, segir aðspurð að leitað hafi verið tilboða hjá helstu heildsölum og ritfangaverslunum vegna kaupa bæjarins á námsgögnunum. Þar hafi A4 átt lægsta tilboðið og því hafi verið tekið. Heildarkostnaður bæjarins vegna innkaupanna eigi þó enn eftir að koma í ljós.

A4 sem hreppti samninginn er í eigu félaga sem forstjóri þess, Egill Þór Sigurðsson, á en hann er eiginmaður Sigrúnar Eddu Jónsdóttur. Samkvæmt ferilskrá Sigrúnar á vef Sjálfstæðisflokksins var hún meðeigandi fyrirtækisins og starfaði við fjármál og eignaumsýslu þess til ársins 2011. Þegar Fréttablaðið ræddi við Sigrúnu á sunnudagskvöld kvaðst hún ekki hafa heyrt af því að A4 hefði fengið samninginn en sagði skiljanlegt að sú staðreynd vekti tortryggni. Aðkoma hennar væri þó engin.

„Ég á ekki í A4, maðurinn minn á það. En auðvitað er ég mikill hagsmunaaðili, það er ekki spurning. En ég hef aldrei komið nálægt innkaupum bæjarins á ritföngum, það er bara ekki hægt.“