Byrja að rukka á útsýnispall Perlunnar

Byrjað verður að rukka þá sem vilja nýta sér útsýnispall Perlunnar þann 1. september næstkomandi. Gjaldið verður 490 krónur fyrir 16 ára og eldri en ókeypis fyrir þá sem eru yngri en 15 ára. Þá munu þeir sem kaupa sig inn í íshelli og jöklasýningar Perlunnar ekki þurfa að greiða gjald fyrir að njóta útsýnisins af pallinum.

Að sögn aðstandenda Perlu Norðursins er gjaldtakan er sett á vegna aukins viðhalds- og rekstrarkostnaðar en Perlan mun í kjölfarið fjölga upplýsingastöndnum á útsýnispallinum í þeim tilgangi - „að auka upplifun gesta og fræða þá enn betur um það sem fyrir augu ber,“ eins og það er orðað í tilkynningu.

„Þegar mest er koma um 5 þúsund gestir til okkar í Perluna á degi hverjum og hefur þessi umferð kallað á aukinn kostnað. Við munum því leggjast í framkvæmdir á útsýnispallinum á næstu misserum þar sem við munum stórbæta aðstöðuna og þar af leiðandi upplifun þeirra sem á útsýnispallinn koma,“ segir Agnes Gunnarsdóttir, framkvæmdastjóri Perlu norðursins í tilkynningunni. „Perlan verður þó að sjálfsögðu opin öllum gestum þeim að kostnaðarlausu og vonum við að gestir Perlunnar taki vel í þetta framtak.“