Getur varla beðið eftir að vínylplatan detti í hús

„Það er plata og það er afmæli og það áttu að vera tónleikar líka í dag en þeir verða því miður ekki,“ segir tónlistarmaðurinn og þúsundþjalasmiðurinn Bubbi Morthens sem heldur upp á 61 árs afmæli sitt í dag og gefur út plötuna Túngumál.

Bubbi hefur oftar en ekki haldið tónleika á afmælinu sínu en núna fær hann óvænt frí. „Ætli ég taki ekki fólkið mitt út að borða. Minn uppáhaldsmatur er indverskur og Austur-Indíafjelagið er einn besti indverski veitingastaður í Evrópu, það get ég vottað. Ég er búinn að prófa þá marga og það sem gerist þar inni eru einhverjir töfrar sem ég veit ekki hverjir eru en þeir finnast á bragðinu.

Svo segi ég kannski bara við krakkana að þau ráði,“ bætir hann við.

Platan Túngumál er nokkur óður til fortíðar því Bubbi leitar til áhrifavalda sem hann kynntist þegar hann vann á vertíð. „Þá var ég svolítið að hlusta á þjóðlagatónlist meðal annars frá Síle og Paragvæ og mexíkóskt rokk. Það var klikkað dæmi og er ennþá. Í Mexíkó eiga þeir mikið af alvöru böndum sem nota tremóló gítara. Í dag hefur það rokk þróast þannig að böndin semja hetjuóð um eiturlyfjabaróna.

Ég sæki áhrif úr allri þessari tónlistarflóru og bind hana með mínum eigin hljóðheim þannig að útkoman verður einhvers konar grautur en mjög Bubbaleg tónlist engu að síður.

Hún er mjög heilsteypt því ég bind öll lögin með þessum tremóló gítar. Þetta er gítarhljóð sem hljómar í True Detective sem margir kannast svo við. Svo verða bónuslög, eitt er tribute lag til Leonard Cohen og heitir bara Cohen blús og annað sem heitir Guð blessi Ísland og tengist hruninu.“

Túngumál kemur út í júlí á vínyl og segir Bubbi að hljóðblöndunin hafi verið með vínyl í huga. „Vínylplatan hefur svolítið komið aftur vegna þess að það er mikill munur á gæðum, ef það er hlustað á gripinn í góðum gæðum. Vínylformatið er gripur sem er listræn heild. Það er athöfn að hlusta á vínylplötu. Sumir taka sér bók í hönd, aðrir fá sér rautt eða hvað sem er og vínylplatan er í þeim flokki. Það þarf næði til að hlusta á vínyl­plötu.

Ég get ekki beðið eftir að fá vínylplötuna í hendurnar, setjast niður og njóta hvers tóns,“ segir afmælisbarnið Bubbi að lokum.