Íslenski drengurinn enn týndur og ættingjarnir vilja ekki tala
Sex ára íslenskur drengur, sem hefur síðastliðna átján mánuði verið leitað af föður sínum og stjúpmóður, er enn ekki fundinn. Móðir hans virðist hafa látið sig hverfa með hann frá heimili þeirra í Svíþjóð en lögreglan á Íslandi og í Svíþjóð rannsaka hvarfið.
„Við höfum engar frekari upplýsingar. Eftir frétt Fréttablaðsins í apríl fengum við símtal frá lögreglunni á Íslandi þar sem þau sögðu að ættingjar þeirra á Íslandi vilji ekki tala við okkur,“ segir Erika Nilsson, stjúpmóðir drengsins. Hún kom til Íslands í apríl til að vekja athygli á málinu. Einkaspæjara á vegum föðurfjölskyldunnar hafði ekki tekist að finna drenginn og sagði honum haldið innandyra ef hann væri á Íslandi. Drengurinn er með sjaldgæfan sjúkdóm.
Íslenska lögreglan telur mæðginin ekki vera á Íslandi. Rannsókn hefur engu skilað. Málið hefur tvær hliðar, annars vegar afhending barns til forsjáraðila á grundvelli Haag-samningsins um brottnám barna og hins vegar sakamál vegna hvarfsins. Móðirin hefur ekki svarað símtölum eða tölvupóstum barnsföður síns síðan í nóvember 2015. Sama á við um fjölskyldu konunnar. Heimildir herma að eftirgrennslan lögreglu mæti ekki samvinnu af hálfu fjölskyldunnar.
„Við létum sænsku lögregluna fá allar upplýsingar frá íslensku lögreglunni. Sænska lögreglan er á kafi í rannsókninni, og hefur óskað upplýsinga frá Facebook til að finna staðsetningu þeirra. Við höfum fengið tölvupóst frá fólki sem vill vel en ekkert sem hönd á festir.“
Tengdar fréttir
Leitar barns og móður á Íslandi með aðstoð spæjara
Faðir og stjúpmóðir íslensks drengs hafa ráðið einkaspæjara til að hafa uppi á drengnum og móður hans. Stjúpmóðirin biðlar til ættingja móður drengsins að veita þeim upplýsingar.
Leit að íslenskum dreng: „Viljum fá að vita að það sé í lagi með hann“
Sænsk kona er stödd hér á landi að leita að stjúpsyni sínum en ekkert hefur spurst til hans og íslenskrar móður hans í eitt og hálft ár. Lögregluyfirvöld í Svíþjóð og á Íslandi rannsaka málið sem barnsrán.
