Borgin gerir gangbraut í Vonarstræti að vettvangi fyrir fíflagang

Reykjavíkurborg hefur ákveðið að setja upp fíflagangbrautarmerki í Vonarstræti í tilefni af alþjóðlegum degi fíflagangs sem haldinn er hátíðlegur á laugardag.

Í frétt á vef borgarinnar segir að dagurinn (International Silly Walk Day) sé haldinn gleðilegur út um allan heim en að þetta sé í fyrsta sinn sem Íslendingar verða með.

„Mottóið er að skemmta sér og öðrum með smá fíflagangi. Þó að dagurinn sé tileinkaður hinu fræga Silly Walk, Monty Python sem John Cleese gerði ódauðlegt um árið, þá er öllum útfærslum á fíflagangi tekið fagnandi. 

Formlegur Fíflagangur hefst kl. 14.00 á laugardag í Vonarstræti og stígur Hrannar Jónsson, formaður Geðhjálpar fyrstu skrefin í fylgd landsþekktra gleðigjafa eins og Jakobs Frímanns Magnússonar, Eddu Björgvins,  Björgvin Franz, Steinda Jr og fleiri.

Aðstandendur tileinka daginn öllum þeim sem berjast fyrir bættri geðheilsu. „Flest okkar reyna að tileinka sér allt það sem bætir, hressir og kætir okkar líf. Sumir eru á því að Fíflagangur sé eitt af því? En það sem nærir okkar gleði er jafn misjafnt og við erum mörg,” segir á Facebook síðu viðburðarins sem  Kærleikur Ljúfur Winzemd skrifar undir, en hann er yfirsjálf Fíflagangs. 

Vonarstræti verður opið fyrir umferð og gilda að sjálfsögðu allar almennar umferðarreglur á fíflagangbrautinni.  Lögreglan gerir ekki athugasemdir við Fíflaganginn „svo framarlega sem hlutaðeigendur gæti að gildandi ákvæðum umferðarlaga í hvívetna“,“ segir í fréttinni og eru vegfarendur beðnir um að sýna tillitssemi og taka allri fífldirfsku með stóískri ró.

Að neðan má sjá atriðið ódauðlega úr þáttum Monty Python.