Skutu upp flugeldum í kirkjugarðinum við Kálfatjörn: „Ég er öskureiður yfir þessu“

Mikil reiði er á meðal íbúa á Vatnsleysuströnd eftir að upp komst að einhverjir aðilar höfðu farið inn í kirkjugarðinn við Kálfatjörn og skotið þar upp flugeldum.

„Ég er öskureiður yfir þessu,“ segir Símon Rafnsson, formaður sóknarnefndar Kálfatjarnarsókn, sem segir mikinn sóðaskap hafa blasað við þeim sem fóru í kirkjugarðinn í morgun til að taka þar ljós af leiðum sem höfðu verið sett þar upp yfir jólahátíðina.

Leifar af flugeldum og tertum lágu á víð og dreif um kirkjugarðinn en Símon er afdráttarlaus þegar hann er spurður álits á svona hegðun: „Hún er ógeðsleg. Kirkjugarðurinn er heilagur staður. Það er ekki svo þéttbýlt á Kálfatjörn að það hefði ekki verið hægt að finna aðra staði til að skjóta þessu upp af. En að fara inn í sjálfan kirkjugarðinn til að gera það, það lýsir þeim sem það gera,“ segir Símon.

Hann hefur verið viðloðinn kirkjustarfið við Kálfatjörn síðan árið 1998. „Og aldrei orðið var við svona framkomu.“

Símon segir það hafa engan tilgang að kæra þetta til lögreglu. „Þarna koma jafnvel þúsundir manna á kvöldin þegar von er á norðurljósum þannig að það verður aldrei hægt að finna út hverjir gerðu þetta,“ segir Símon.

Það var systir Símonar, Hrafnhildur Bryndís Rafnsdóttir, sem fór í kirkjugarðinn í morgun til að taka þar niður jólaljósin en henni var brugðið vegna aðkomunnar.

„Þetta er algjört virðingarleysi og ég var virkilega sár. Þetta er helgireitur og þetta á ekki að eiga sér stað,“ segir Hrafnhildur. Hún segir erfitt að gera sér grein fyrir því hvenær flugeldunum var skotið upp en grunar að það hafi átt sér stað í gær.

Samkvæmt almennum hegningarlögum varðar það sektum, eða fangelsi allt að sex mánuðum, ef nokkur raskar friðhelgi grafar.