Kveðst hvorki treysta læknum né dómstólum eftir ítrekuð brot á persónuverndarlögum: „Ég er bara orðinn flóttamaður“

Persónuvernd úrskurðaði fyrir helgi að Hæstarétti beri að afmá persónugreinanlegar upplýsingar um Pál Sverrisson úr dómi sem féll árið 1999 í máli sem hann höfðaði gegn Vátryggingafélagi Íslands vegna umferðarslyss. Í dómnum var Páll meðal annars nafngreindur og var þar að fiinna upplýsingar um fjármál hans, örorku og sjúkrasögu.

Í úrskurði Persónuverndar segir að þó að skylt sé að birta hæstaréttardóma sé ekki heimild fyrir því að birta viðkvæmar persónuuupplýsingar.

„Þessir tveir úrskurðir eru mjög merkilegir og ekki síst þessi sem snýr að Hæstarétti. Ég reikna með að þetta sé í fyrsta sinn sem stjórnsýslustofnun úrskurðar um það að hæstiréttur íslands hafi ekki farið að lögum og þá er ekki veirð að tala um dómsvald hæstaréttar, heldur verklag,“ segir Áslaug Björgvinsdóttir, lögmaður. Rætt var við hana og Pál í Bítinu á Bylgjunn í morgun.

„Þetta eru ekki einstök mistök. Það liggur jú fyrir [...] að umboðsmaður Barna hefur undanfarin ár bent á það í ársskýrslum að réttaröryggi barna og vernd þeirra sem barnasáttmálinn snýr að, sé ekki tryggð við birtingu dóma hjá dómstólunum.“

Vissi ekki af málinu í nokkur ár

Þetta er ekki í fyrsta sinn sem Persónuvernd úrskurðar að brotið hafi verið á Páli með birtingu persónugreinanlegra gagna.

Í júní síðastliðnum úrskurðaði Persónuvernd að vinnsla Héraðsdóms Reykjaness árið 2013 og vinnsla Héraðsdóms Reykjavíkur árið 2016 hafi ekki verið í samræmi við lög um persónuvernd og meðferð persónuupplýsinga.

Í apríl síðastliðnum dæmdi Hæstiréttur íslenska ríkið til að greiða Páli 200 þúsund krónur vegna þess að upplýsingar úr sjúkraskrá hans voru birtar opinberlega en Páll hafði farið fram á 35 milljónir króna í bætur.

Baráttu Páls fyrir dómstólum má rekja til þess að haustið 2011 birtust viðkvæmar upplýsingar úr sjúkraskrám Páls í Læknablaðinu, meðal annars upplýsingar sem hann vissi ekki af. Hann höfðaði skaðabótamál vegna þessa sem dæmt var í í Héraðsdómi Reykjaness árið 2013 og voru dæmdar miskabætur en dómurinn var síðan birtur á vef dómstólana, domstolar.is, með nafni Páls, aldri hans, bæjarfélagi sem og upplýsingum úr sjúkraskrám.

Páll vissi ekki af þessu fyrr en árið 2016 og beindi þá lögmaður hans því til réttarins að dómurinn yrði fjarlægður og ekki birtur aftur nema viðkvæmar og persónugreinanlegar upplýsingar yrðu máðar burt. Dómurinn varð við því og fjarlægði dóminn. 

Ekki tilefni til kæru

Síðari dómurinn, sem kveðinn var upp í Héraðsdómi Reykjavíkur árið 2016, sneri einnig að miskabótakröfu Páls þar sem læknir hafði sent siðanefnd Læknafélags Íslands upplýsingar úr sjúkraskrá. Sá dómur var einnig birtur með nafni Páls og upplýsingum um heilsuhagi hans auk þess sem vísað var í dóm Héraðsdóms Reykjaness frá árinu 2013.

Í öllum tilvikum var það niðurstaða Persónuverndar að ekki væri tilefni til að kæra atvikin til lögreglu. Páll segist ósáttur með þá niðurstöðu.

„Ég er eiginlega meira og minna búinn að vera erlendis og hef ekki getað leitað læknis því traustið er farið. Traustið er algjörlega farið á dómstólum. Ég verð eiginlega að flytja héðan burt. Ég er í stöðu þeirra sem koma hérna í hundraðatali með flugi. Ég er bara orðinn flóttamaður.“

Í spilaranum hér fyrir neðan má heyra viðtalið við Pál og Áslaugu í heild sinni.