Bjóða foreldrum lán fyrir tölvu með vöxtum

Sveitarfélagið Árborg býður foreldrum og nemendum spjaldtölvur á kaupleigu, en spjaldtölvuvæðing stendur fyrir dyrum í Vallaskóla á Selfossi. Sveitarfélagið kaupir þá tækin, með afslætti, á 45.042 krónur. Sveitarfélagið hefur svo samþykkt að lána fjölskyldum fyrir kaupunum á 3,5 prósent vöxtum. „Það er mun hagstæðara en aðrar lánastofnanir eru að bjóða og er þetta gert til að halda verði í algjöru lágmarki,“ segir í kynningarbæklingi sem foreldrum var sendur.

Vert er að nefna að foreldrar eru ekki skyldugir til að kaupa tæki. Nemendur geta fengið afnot af tækjum í eigu skólans. Þau tæki eru af eldri gerð og geymd í skólanum.

„Það er ekki í anda grunnskólalaga að foreldrar fjármagni spjaldtölvuvæðingu skólans,“ segir Þröstur Jónasson, stjórnarmaður hjá Heimilum og skóla, landssamtökum foreldra. „Í Kópavogi til dæmis var farin sú leið að sveitarfélagið kaupir spjaldtölvur fyrir alla og nemendurnir hafa allir sams konar tæki til afnota án endurgjalds. Foreldrar geta líka keypt spjaldtölvuna á góðum afslætti og nemandinn haldið henni í sumarfríum og eftir að skólagöngu lýkur.“

Leifur Viðarsson, kennari við Vallaskóla, segir hugmyndinni almennt vel tekið meðal foreldra. „Það er auðvitað enginn skyldugur að kaupa tæki og við munum gæta þess að engin mismunun verði í því.“

Foreldri barns í skólanum, Eva Ísfeld, segist skilja hugsunina að baki. „Að efnaminni foreldrar geti fengið aðstoð við tækjakaupin . En þetta strýkur mér öfugt verð ég að segja, að sveitarfélagið sé að lána fyrir námsgögnum með vöxtum.“

Velferðarvaktin stendur fyrir könnun hjá sveitarfélögum landsins um kostnaðarþátttöku grunnskólanema varðandi skólagöngu. Sveitarfélögin eru hvött til að halda þeim kostnaði í lágmarki til að koma til móts við þá sem standa höllum fæti. 

„Kostnaðarþátttaka nemenda upp á tugi þúsunda króna samrýmist ekki anda Barnasáttmálans né grunnskólalaganna. Velferðarvaktin hefur hvatt sveitarfélög til að leggja hana af eða halda í lágmarki svo bágur efnahagur komi ekki niður á lífi barna,“ segir Siv Friðleifsdóttir, formaður Velferðarvaktarinnar.