Snjómokstur og útblástur: Bifvélavirkjameistari segir mikilvægt að moka fyrst frá pústinu

Bifvélavirkjameistarinn Guðmundur Ingi Skúlason, framkvæmdastjóri vélaverkstæðisins Kistufells, segir að ávallt eigi að moka snjónum fyrst frá pústi bíla. Hann segir alveg ljóst að útblástur geti borist inn í bíla.

Guðmundur Ingi ræddi snjómokstur og útblástur í Reykjavík síðdegis á Bylgjunni í dag.

Frétt af hinni eins árs gömlu Lovísu vakti mikla athygli í vikunni en Kristín Hafsteinsdóttir, móðir Lovísu, sagði hana hafa verið hætt komna á meðan maðurinn hennar mokaði frá bílnum eftir snjókomuna miklu aðfaranótt sunnudagsins. Lovísu hafði verið komið fyrir í bílnum á meðan og eftir nokkra stund kom maðurinn að henni þar sem hún sat grafkyrr í bílstólnum, með lokuð augun, svo hann hélt að hún væri sofnuð.

„Þegar hann opnar bílhurðina til þess að hleypa stráknum inn í bílinn kemur á móti honum útblásturslykt frá bílnum,“ sagði í færslu Kristínar, en snjórinn hafði þá lokað fyrir púströr bílsins svo að útblásturinn barst inn í bílinn.

Eftir að fréttin birtist hefur mikið verið rætt um hvort það sé yfir höfuð hægt að útblástur berist inn í bíla.

Getur borist inn í bíla

Guðmundur Ingi segir alveg ljóst að útblásturinn geti borist inn í bíla líkt og þarna er lýst. „Klárlega getur útblásturinn farið inn í bíl. Bæði eins og var nefnt í gömlum bílum, þá geta þeir verið misþéttir og þetta leitar inn af því að ef útblásturinn kemst ekki greiða leið í burtu frá bílnum. Svo leitar þetta undir bílinn, því væntanlega eru holrúm undir bílnum. Þar er enginn snjór, þetta leitar fram upp undir vélina, þar sem að miðstöðin dregur inn loft. Þá á þetta greiða leið beint inn í bíl.“

Hvernig er best að haga sér ef menn lenda í þessari aðstöðu?

„Sjálfsagt þarf að moka beint frá pústinu. En þetta er eins og við höfum orðið varir við sem vinnum við þetta, ef menn setja bíl í gang inni, setja ekki útblásturskerfið á, þá eru menn fljótir að finna fyrir höfuðverk og slappleika. Þetta getur alveg leitað inn í óþétta bíla,“ segir Guðmundur Ingi og bendir á að í miklum stillum fari útblásturinn inn í gegnum miðstöðina.

Hlusta má á viðtalið við heild sinni í spilaranum að ofan.