Styttir upp á Suðausturlandi með deginum

Enn er smávegis rigning eða súld á Suðausturlandi þar sem starfsmenn Vegagerðarinnar vinna nú að því að koma upp bráðabirgðabrú yfir Steinavötn í Suðursveit svo hægt sé að opna hringveginn að nýju.

Brúin skemmdist í þeim miklu vatnavöxtum sem urðu í vikunni en samkvæmt upplýsingum frá Veðurstofunni mun stytta upp með deginum. Það dregur áfram úr vatnavöxtum á svæðinu þó sú litla rigning sem nú er verði ef til vill til þess að það dragi hægar úr en ella.

Hringvegurinn var opnaður við Hólmsá, vestan Hornafjarðar, í gærkvöldi en verður þó áfram lokaður við Steinavötn næstu daga á meðan verið er að byggja bráðabirgðabrúna. Björgunarsveitir og lögregla vakta svæðið og segir í tilkynningu frá Lögreglunni á Suðurlandi að vísa þurfi frá fjölda ferðamanna sem virðist ekki hafa kynnt sér eða fengið upplýsingar um ástandið.

Samkvæmt spá Veðurstofunnar á að snúa í norðlæga átt í kvöld eða nótt og mega starfsmenn Vegagerðarinnar á svæðinu búast við fremur hvössu en björtu veðri eftir það. 

Jarðvegsskriður féllu á nokkrum stöðum í vikunni þegar úrkoma var sem mest og Veðurstofan segir áfram hættu á skriðuföllum á svæðinu.