Umboðsmaður Alþingis segir Árna Sigfússon hafa verið vanhæfan

Árni Sigfússon var vanhæfur til að veita styrk úr Orkusjóði til Nýsköpunarmiðstöðvar Íslands þar sem bróðir hans, Þorsteinn Ingi Sigfússon, er forstjóri. Þetta er mat umboðsmanns Alþingis.

Fréttablaðið fjallaði um málið í október síðastliðnum en Orkusjóður er í eigu ríkisins og sér ráðgjafarnefnd Orkusjóðs um að skila tillögum til iðnaðarráðherra um einstakar greiðslur úr sjóðnum. Árni Sigfússon er formaður ráðgjafanefndar Orkusjóðs en hann vék ekki þegar styrkveitingin til Nýsköpunarmiðstöðvar Íslands var samþykkt í stjórn sjóðsins.

Umboðsmaður tekur fram að hann hafi ekki fallist á þær skýringar ráðuneytisins að þáttur Árna hafi verið lítilfjörlegur í merkingu laganna og ylli þar með ekki vanhæfi að félli undir undantekningar frá hæfisreglunum að öðru leyti. Niðurstaða umboðsmanns var því sú að Árni hafi verið vanhæfur til meðferðar málsins og að hann hefði ekki mátt taka þátt í undirbúningi, meðferð eða úrlausn þess. Þar sem fyrir lá að hann tók þátt í undirbúningi tillagnanna og sat fund þar sem þær voru afgreiddar taldi umboðsmaður að meðferð málsins hefði ekki verið í samræmi við lög.

Nýsköpunarfyrirtækið Valorka gerði athugasemd við styrkveitinguna til Nýsköpunarmiðstöðvar en eftir að fyrstu fregnir bárust um málið kom tilkynning frá atvinnuvega- og nýsköpunarráðuneytinu þar sem upplýst var um opinbera styrki til Valorku án þess að birtar væru upplýsingar um sambærilegar styrkveitingar til annarra aðila sem störfuðu að verkefnum á sama sviði.

Umboðsmaður tók þessa tilkynningu til skoðunar og fékk ekki séð að hún hefði verið í nægjanlegu samhengi við frétt Fréttablaðsins um vensl Árna Sigfússonar og bróður hans sem átti að vera tilefni hennar og aðra gagnrýni fyrirsvarsmanna Valorku. Í áliti umboðsmanns kemur fram að efni tilkynningarinnar hefði ekki verið í samræmi við vandaða stjórnsýsluhætti og beindi því til ráðuneytisins að hafa það sjónarmið í huga framvegis í störfum sínum.