Eftirlitsmyndavélar nú hluti af daglegu lífi

Sprenging hefur orðið í sölu eftirlitsmyndavéla og uppsetningum á slíkum kerfum síðustu tvö árin. Viðmælendur Fréttablaðsins eru sammála um að búnaðurinn sé orðinn aðgengilegri og almennari með einfaldari tækni og viðráðanlegra verði fyrir venjulegar fjölskyldur.

„Fyrir fáeinum árum þurfti upptökukerfi, leggja kapla og símasamband. Í dag tengirðu myndavél við netið heima hjá þér og stingur í samband,“ segir Halldór Hrafn Jónsson, framkvæmdastjóri sölusviðs Tölvuteks. Hann segir að á tíu árum hafi búnaður í eftirlitsmyndavélum gjörbreyst – sérstaklega með skýbúnaði (e. cloud). Þannig sé hægt að skoða upptökur úr myndavélinni í símanum. Einnig er hægt að stilla myndavélarnar þannig að þær sendi skilaboð ef þær nema hreyfingu

„Það hefur orðið gríðarleg aukning á notkun þessara tækja. Ég vil ekki tengja það við stóra bróður eða væni­sýki heldur er þetta bara viðbót við daglega lífið. Fólk getur fylgst með þegar börnin koma heim, sumir eru með þetta í svefnherbergjum ungbarna í stað barnapíutækja og fyrir öðrum er þetta öryggisatriði. Að mínu mati er þetta neysla, ekki hræðsla,“ segir Halldór.

„Þetta getur verið þægilegt þegar unglingarnar hætta að nenna að fara með í sumarbústaðinn,“ segir Hjörtur Freyr Vigfússon, markaðsstjóri Securitas, og tekur undir orð Halldórs um aukna notkun eftirlitsmyndavéla. „Það er mælanleg aukning í sölu myndeftirlits bæði inni á heimilum og í sumarbústöðum á síðustu misserum.“

Hjörtur segir slík kerfi hafa í gegnum tíðina verið mjög dýr en nú sé öldin önnur. „Þar af leiðandi er þetta orðið almennara og ósköp venjulegt fólk fær sér eftirlitsmyndavélar. Þetta er sérlega þægilegt til að fylgjast með sumarbústaðnum, hvort allt sé í lagi en líka bara til að athuga hvernig veðrið sé áður en maður leggur í hann. Maður hefur líka heyrt af foreldrum sem eru rólegri í útlöndum og geta fylgst með unga fólkinu sem er eitt heima – hvort haldin séu teiti og svo framvegis. Þannig að fyrst og fremst snýst þetta um hugarró.“

Fréttin birtist fyrst í Fréttablaðinu 21. mars.