Stjórnendum í Frostaskjóli og Kampi sagt upp vegna sameiningar

Átta stjórnendum í frístundamiðstöðvunum Frostaskjóli og Kampi verður sagt upp og fjórir nýir stjórnendur ráðnir í staðinn vegna sameiningar yfirstjórna frístundamiðstöðvanna sem kemur til framkvæmda þann 1. júlí næstkomandi.

Auglýst verður eftir nýjum stjórnendum á næstu misserum en um er að ræða framkvæmdastjóra, fjármálastjóra, deildarstjóra barnastarfs og deildarstjóra unglingastarfs.

Sameiningin er hagræðingaraðgerð og var samþykkt á fundi skóla-og frístundaráðs í vikunni. Skúli Helgason, formaður ráðsins, segir áætlað borgin muni spara 40 milljónir á ári með henni. Á þessu ári er því áætlað að sparnaðurinn nemi 20 milljónum.

Aðspurður segir Skúli ekki áætlað að fara í breytingar á húsnæði frístundamiðstöðvanna að svo stöddu en ekki liggur fyrir hvar sameinuð yfirstjórn Frostaskjóls og Kamps mun vera.

Skúli segir að núverandi stjórnendum sem verður sagt upp hafi verið kynnt áform borgarinnar um að sameina yfirstjórnirnar tvær í byrjun árs og svo aftur núna þegar skóla-og frístundaráð hafi tekið tillöguna fyrir.

„Þessi hugmynd hefur verið í umræðunni í mörg ár þannig að ég held að þetta hafi ekki komið mörgum í þessum geira á óvart,“ segir Skúli. Hvort að stefnt sé að því að sameina fleiri yfirstjórnir frístundamiðstöðva í borginni sem eru alls sex talsins segir Skúli enga ákvörðun hafa verið tekna um það.