Krufning á líki George Michael sögð ófullnægjandi

Lögregla í Bretlandi segir að krufning á líki söngvarans George Michael hafi verið „ófullnægjandi“. Söngvarinn lést á heimili sínu í Oxfordskíri á jóladag, 53 ára að aldri.

Lögregla í Thames-dal segir í yfirlýsingu að frekari rannsóknir verði nú gerðar til að skera úr um hvað dró George Michael til dauða.

Í frétt BBC segir að ekki sé talið að niðurstöður muni liggja fyrir fyrr en að nokkrum vikum liðnum.

Andlát söngvarans er enn óútskýrt, en ekki er talið að nokkuð saknæmt hafi átt sér stað.

Michael Lippman, umboðsmaður George Michael, hefur áður sagt að skjólstæðingur sinn hafi látist af völdum hjartabilunar.