Rútur brenndar af vígamönnum

Uppreisnarmenn í Sýrlandi brenndu í gær sex rútur sem voru á leið til þorpanna Foah og Kefraya til þess að flytja á brott veika og slasaða borgara. Talið er að hryðjuverkasamtökin Jabhat al-Sham, sem áður gengu undir nafninu Al-Nusra Front, beri ábyrgð á árásinni. Hryðjuverkasamtökin berjast með uppreisnarmönnum gegn stjórnarher Sýrlands og er þeirra helsta markmið að koma á íslömsku ríki í Sýrlandi.

Uppreisnarmenn og stjórnarher Bashars al Assad, forseta Sýrlands, gerðu hlé á átökum sínum á fimmtudag svo að unnt væri að flytja á brott saklausa borgara frá vígstöðvum í Aleppo.

Samkvæmt sádiarabísku sjónvarpsstöðinni Al Ekhbariya átti fyrst um sinn að flytja 1.200 manns frá Aleppo og svipaðan fjölda frá þorpunum Foah og Kefraya.

Þorpin tvö sem eru undir stjórn stjórnarhersins eru umkringd yfirráðasvæðum uppreisnarmanna. Þar ríkir mikil hungursneyð og erfitt hefur verið að koma íbúum þorpanna til aðstoðar. Samkvæmt heimildum fréttastofu BBC hafa margir gripið til þess neyðarúrræðis að borða gras til þess að lifa af.

Árum saman hafa uppreisnarmenn haft austurhluta borgarinnar Aleppo á sínu valdi en undanfarnar vikur hefur stjórnarherinn gert harða hríð að þeim í þessum hverfum með sprengjuárásum. Uppreisnarmennirnir hafa misst yfirráðin og eru að hverfa á braut.

Vopnahléssamningur upp­reisnar­manna og stjórnarhersins kvað á um að hermenn uppreisnar­manna og fjölskyldur þeirra í austurhluta Aleppo fengju að yfirgefa borginni í friði gegn því að flytja mætti á brott veika og slasaða borgara Foah og Kefraya.

Rússar og Tyrkir höfðu milligöngu í samningaviðræðunum um vopnahléið. Rússar styðja stjórn Assads forseta en Tyrkir hafa stutt uppreisnarmennina, rétt eins og Bandaríkin og önnur vestræn ríki.

Í dag mun Öryggisráð Sameinuðu þjóðanna kjósa um hvort fulltrúar Sameinuðu þjóðanna geti fylgst með brottflutningunum frá Aleppo og öryggi þeirra sem dvelja í borginni. Samkvæmt tillögunni er lögð áhersla á að brottflutningur borgaranna sé að þeirra eigin frumkvæði og að þeir fái að velja lokaáfanga­stað sinn. Í tillögunni segir einnig að vernda beri jafnt þá borgara sem ákveða að yfirgefa Aleppo og þá sem ákveða að dvelja í borginni.

Óttast er að Rússar beiti neitunarvaldi sínu í Öryggisráðinu og komi í veg fyrir framkvæmd tillögunnar. Þeir hafa hingað til beitt neitunarvaldi sínu í sex tillögum sem varða Sýrland á síðustu fimm árum.

Fréttin birtist fyrst í Fréttablaðinu.