Wilbek hafnaði þýska landsliðinu

Ulrik Wilbek, fyrrum þjálfari dönsku karla- og kvennalandsliðanna í handbolta, afþakkaði boð þýska handknattleikssambandsins um að taka við karlalandsliðinu af Degi Sigurðssyni.

Leitin að eftirmanni Dags stendur enn yfir en sem kunnugt er stígur hann frá borði eftir HM í Frakklandi í byrjun næsta árs.

Þýska handknattleikssambandið hafði áhuga á að fá Wilbek í starfið en hann afþakkaði pent.

„Hann er þrautreyndur þjálfari sem ég hef miklar mætur á. En hann sagði nei,“ sagði Bob Hanning, varaforseti þýska handknattleikssambandsins.

Samkvæmt frétt TV2 stendur valið nú á milli Christians Prokop, þjálfara Leipzig, og Markus Baur, þjálfara Stuttgart.

„Þeir eru báðir frábærir. Við vorum með þrjá menn á blaði og nú eru tveir eftir. Þeir eru ólíkir menn með ólíkar hugmyndir um handbolta en báðir henta þörfum okkar vel,“ sagði Hanning.