Lögreglurannsókn hafin vegna gruns um ofbeldi á leikskóla í Grafarvogi

Starfsmaður á leikskólanum Korpukoti í Grafarvogi, sem sakaður er um að hafa beitt barn á leikskólanum ofbeldi, hefur verið leystur frá störfum á meðan málið er í rannsókn barnaverndaryfirvalda og lögreglu. Honum hefur verið boðin sálfræðimeðferð og starfsfólki leikskólans áfallahjálp, samkvæmt heimildum fréttastofu.

Barnið sem um ræðir er tveggja ára stúlka. Hún er sögð hafa komið heim af leikskólanum fyrir nokkru síðan með áverka á læri, sem móðir hennar telur af mannavöldum. Móðirin fór á fund með Kristínu Björk Viðarsdóttur, leikskólastjóra Korpukots, sem samkvæmt heimildum hafði í kjölfarið sambandið við barnaverndaryfirvöld.

Kristín Björk hefur ekki viljað tjá sig um málið en í tölvupósti sem hún sendi foreldrum segir hún að ekkert renni stoðum undir það að ásakanir móðurinnar eigi við rök að styðjast, en að unnið sé eftir ákveðnum verklagsreglum.

Sjá einnig:„Þessar ásakanir koma eðlilega illa við starfsfólk“

Málið komið á borð lögreglu

Málið er á borði Barnaverndar Kópavogs en Barnavernd Reykjavíkur var vanhæf í málinu vegna tengsla framkvæmdastjórans við fjölskyldu barnsins. Það barst nýlega inn á borð lögreglu, en lögum samkvæmt á barnavernd að hafa frumkvæði að því hvort óska eigi eftir lögreglurannsókn vegna brots gegn barni. Ekki hafa fengist upplýsingar um hvernig rannsókn málsins miðar, hvorki frá lögreglu né Barnavernd Kópavogs.

Samkvæmt upplýsingum frá Reykjavíkurborg er unnið að því að safna gögnum um málið, en umræddur leikskóli er einkarekinn og lýtur því öðrum reglum en leikskólar á vegum borgarinnar. Að sögn Helga Grímssonar, formanns skóla- og frístundasviðs, hefur leikskólinn fengið viðeigandi ráðleggingar, en segist lítið geta tjáð sig um málið að öðru leyti. Heimildir herma þó að borgin hafi þegar farið í eftirlitsferðir á leikskólann.

Sigrún Björnsdóttir, upplýsingafulltrúi Reykjavíkurborgar, sagði í skriflegu svari við fyrirspurn fréttastofu á dögunum að þegar um sé að ræða sjálfstætt starfandi leikskóla sé það hlutverk rekstraraðila og leikskólastjóra að grípa til viðeigandi aðgerða en að það sé hlutverk borgarinnar að tryggja að viðeigandi úrbætur séu gerðar.