Breytt viðhorf dómara til Barnahúss

Bretar hafa í hyggju að opna tvö barnahús að íslenskri fyrirmynd. Í slíkum húsum fá börn sem hafa þolað kynferðisofbeldi stuðning og þar tekur sérfræðingur skýrslur af barninu sem notaðar eru fyrir dómi.

Amber Rudd, innanríkisráðherra Breta, segir í viðtali við BBC að markmiðið með opnun barnahúsanna sé að læra af þeim kynferðisbrotahneykslismálum sem Bretar hafi upplifað í fortíðinni.

Bragi Guðbrandsson, forstöðumaður Barnaverndarstofu, segir við Fréttablaðið að breskar sendinefndir hafi komið hingað tvisvar á rúmu ári. Fyrst sérfræðingar frá Kings College í Lundúnum. Síðar kom fjölmennari sendinefnd með fulltrúum frá ráðuneytinu, umboðsmanni barna, saksóknaraembættinu og fleiri embættum.

Bragi segir að nú þegar hafi barnahús að íslenskri fyrirmynd verið opnuð á öllum Norðurlöndunum. Í sex öðrum ríkjum sé opnun slíkra barnahúsa í undirbúningi eða ákvörðun um hana verið tekin. 

Barnahús hér á Íslandi hefur starfað frá 1998 eða í átján ár. Á fyrri árum voru dómarar tregir til að nýta sér starfsemi hússins fyrir skýrslutöku en Bragi segir að sú staða sé gjörbreytt. „Þetta er orðin viðurkennd aðferð af hálfu íslenskra dómara og hefur verið síðustu tvö til þrjú árin,“ segir hann. Ástæðan sé fyrst og fremst sú að það hafi orðið kynslóðaskipti hjá dómurum. „Það eru komnar yngri kynslóðir dómara sem hafa frjálslyndari viðhorf,“ segir hann.

Bragi segir að það hafi orðið ör þróun í barnarétti á síðari árum. Dómaframkvæmd Mannréttindadómstóls Evrópu hafi leitt í ljós að fjallað er um réttindi barna í sakamálum í þessum dómsúrlausnum með skýrum hætti. „Við sjáum í dómaframkvæmdinni að Mannréttindadómstóllinn vill að það sé tekið tillit til sérstöðu barnanna,“ segir Bragi. 

Fréttin birtist fyrst í Fréttablaðinu.