Leigjendasamtökin segja íbúðir Búseta enga lausn fyrir leigjendur

Samtök leigjenda á Íslandi gagnrýna hátt verð á nýjum íbúðum sem Búseti hefur nú til sölu, þar sem mánaðargreiðslur eru allt upp í 400 þúsund krónur. Borgarstjóri segist vona að íbúðir sem borgin seldi Búseta á kostnaðarverði án útboðs, til að koma til móts við eignaminna fólk og leigjendur, verði ódýrari.

Búseti auglýsti í byrjun ágúst i 70 búseturétti í 6 nýbyggingum til sölu. Verðin eru mismunandi eftir gerð íbúða en mánaðarlegar greiðslur eru allt frá 150 þúsund krónum upp í fjögur hundruð þúsund. Sem dæmi má taka að ef valin er B-leið á 128 fermetra íbúð í Einholti er mánaðarlegt búsetugjald rúmlega þrjú hundruð tuttugu og fimmtán þúsund krónur. Búseturétturinn kostar rúmar sjö milljónir og þar af fara fjórar og hálf til eignamyndunar.

Gísli Örn Bjarnhéðinsson, framkvæmdastjóri Búseta, segir í viðtali við Fréttablaðið í dag að búseturétturinn sé dýrari en oft áður, meðal annars vegna hærri byggingarkostnaðar sökum aukinna krafna í nýrri byggingarreglugerð. Þrátt fyrir það sé eftirspurnin mikil og margir vilja bjóða hærra en uppsett verð í réttinn.

Búseti fékk fyrir skömmu vilyrði frá Reykjavíkurborg fyrir uppbyggingu íbúða á lóð Keilugranda, án útboðs, til að koma til móts við húsnæðisvanda leigjenda og eignalítils fólks. Hólmsteinn Brekkan, framkvæmdastjóri Samtaka leigjenda á Íslandi segir þetta ekki vera leiðina til þess. 

„Búseturéttargjaldið er það hátt og mánaðarkostnaðurinn er náttúrlega alveg út úr korti. Eins og formaður Búseta segir sjálfur þá eru þetta íbúðir fyrir efnameira fólk. Og þetta eru ekki margar íbúðir svo það er engin lausn í þessu.“ 

Hólmsteinn segir að leigjendur hafi upp til hópa ekki efni á búsetuúrræðinu.

„En aftur á móti þá er ekkert sem bendir til þess að það sé verið að vinna í neinum lausnum fyrir fólk sem er virkilega í íbúðavandræðum,“ segir hann.

Dagur B. Eggertsson borgarstjóri segist vona að þær íbúðir sem Búseti reisir í samstarfi við borgina verði ódýrari en þær sem nú eru auglýstar.

„Mér finnst þetta nú virka frekar hátt satt best að segja. En hjá Búseta þá tekur verðlagningin mið af kostnaði við hvert verkefni fyrir sig. Við erum á leiðinni í þrjú ný verkefni með búseta og ég vonast til þess að þar náum við að halda verðinu niðri, eða þeir öllu heldur.“