Mjög mikil umferð er nú á höfuðborgarsvæðinu enda margir á leiðinni heim úr vinnu til að ná að sjá leik Íslands og Austurríkis sem nú fer fram á Evrópumótinu í knattspyrnu.

Þegar Vísir hafði samband við umferðardeild lögreglunnar sagði varðstjóri að þétt umferð væri á höfuðborgarsvæðinu en engin óhöpp eða neitt slíkt hefðu orðið.

Þá væri það vissulega óvenjulegt að svo mikil umferð væri á sama tíma þar sem hún dreifist vanalega meira í eftirmiðdaginn en það vilja jú allir ná að sjá strákana okkar í seinasta leik sínum í riðlakeppninni á EM.