Innlent

„Líka mýkt í BDSM“

Birgir Örn Steinarsson skrifar
Sigga Dögg fagnar aukinni umræðu um BDSM-kynlíf.
Sigga Dögg fagnar aukinni umræðu um BDSM-kynlíf. Visir
Kosning um aðild BDSM fólks inn í Samtökin´78 hefur vakið athygli og umtal síðustu daga. BDSM fólk var naumlega kosið inn í Samtökin síðasta laugardag en stjórnin hefur lagt til að kosið verði að nýju sökum formgalla á fundarboði. Ef svo fer, verður kosið aftur í lok mánaðarins.

Eitt af helstu ágreiningsefnum hefur verið hvort BDSM kynlíf geti flokkast sem kynhneigð eða hvort sé í raun um kynhegðun að ræða. Sigga Dögg kynfræðingur segir ekki auðvelt að svara þeirri spurningu og því sé mikilvægt að halda umræðunni á lofti.

„Það hefur verið viss samhljómur meðal réttindabaráttu BDSM-fólks og samkynhneigðra,“ útskýrir Sigga. „Það sem samkynhneigðir gera heima hjá sér er eitthvað sem fólk vildi fyrst ekkert vita af. Við hugsuðum um kynlíf sem bara einn hlut, sem samfarir. Það er það sem er að gerast núna með BDSM-ið. Umtalið snýst alltaf um kynferðisleg örvun eða útrás en þau segja nei við því. Það sem þau eru að segja er að þetta sé hluti af því hvernig þau elski. Hvernig þau tjái tilfinningar sínar til annarrar manneskju. Að þó svo að þau geri það með flengingum eða bindingum þá sé alltaf ótrúleg virðing og ást á milli manneskja. Að þetta sé tjáningarmáti sem kynlíf geti verið hluti af, en það þurfi ekki að vera það. Þess vegna sé þetta stærra og meira en þau sjálf. Þau segjast til dæmis ekki fara í samband nema að láta vita af því að þetta sé hluti af þeim og svona verði þau að fá að tjá sína ást. Ef viðkomandi sé ekki reiðubúinn til þess, sé ekki farið í samband.“

Aðild BDSM-samtakanna ætlar að reynast Samtökunum ´78 ákaflega erfið viðureignar.Vísir
„Sá sem er undir hefur meiri stjórn en sá sem er yfir“

Sigga Dögg segist sjálf hafa þurft að sperra upp eyrun og hlusta til þess að auka skilning sinn á BDSM-kynlífi.

„Það sem hefur gleymst í þessu er að það er mýkt í þessu líka. Fólk sér bara leður, múla og svipur. Sársauki er hin hliðin af unaði og það gleymist oft hversu fín lína er þar á milli. Hvernig fólk skynjar hann misjafnt og hvernig áhrif hann hefur á líkamann. BDSM fólk er alltaf við stjórnvölinn, hvort sem þú ert undir eða yfir. Í raun hefur sá sem er undir meiri stjórn en sá sem er yfir. Sá sem er yfir þarf alltaf að lesa í aðstæður og þarf að geta treyst þeim sem er undir að láta vita ef viðkomandi vill stoppa. Það ríkir gagnkvæm virðing á milli fólks og traust. Það þarf að undirbúa þetta fyrir fram. Þetta er ekki þannig að einhver ákveði að hann ætli að flengja þennan og svo hinn. Það er alltaf ákveðið fyrirfram hvað megi gera við hvern og hvernig. Það finnst mér ótrúlega fallegt.“

Jamie Dornan og Dakota Johnson í hlutverkum sínum.
Umræðan skapaðist vegna 50 Shades of Grey

Sigga segir vinsældir kvikmyndarinnar 50 Shades of Grey eiga stóran þátt í aukinni umræðu um BDSM-kynlíf.

„Fólk er alltaf fljótt að jaðarsetja aðra því við eigum það til að setja fólk í kassa. En svo leyfum við sífellt meiri fjölbreytileika og skiljum meira um það hvernig fólk kýs að elska. Hvort það sé ein manneskja í einu eða margar, hvort sem það sé með samförum eða ekki. Við erum alltaf að verða umburðarlyndari um allt. Það er enginn að tala um að fara halda BDSM fræðslu fyrir grunnskóla. Það er bara verið að tala um hvað felst í þessu“.

Sigga Dögg sótti meðal annars öryggisnámskeið BDSM til þess að kynna sér málin betur.

„Ég man þegar ég var unglingur þá voru handjárnin voðalega vinsæl. Svona loðin og sæt. Svo kemst ég að því að í BDSM eru þau úr sögunni. Allt sem ekki er hægt að losa sig úr á svipstundu er ekki leyfilegt. Það þarf að nota eitthvað sem má klippa og er öruggt aðgengi úr ef eitthvað skyldi koma upp á eða ef einhverjum líður illa og vill komast út úr aðstæðunum strax! Ég man svo vel eftir þessari umræðu um lykilinn, hvar er hann og hver hefur hann? Að það sé hægt fyrir einhvern að skilja viðkomandi eftir – það er allt annað valdatafl.“


Tengdar fréttir

Á þriðja tug hefur skráð sig úr Samtökunum ’78

Tuttugu og fjórir hafa skráð sig úr Samtökunum ’78 en sex hafa skráð sig í samtökin í kjölfar þess að aðildarumsókn BDSM-samtakanna var samþykkt um helgina. Alls eru 1.146 manns skráðir í samtökin.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.