United-mönnum kippt niður á jörðina | Sjáðu markið og rauða spjaldið

Salomon Rondón skoraði eina mark leiksins þegar West Brom tók á móti Manchester United í lokaleik 29. umferðar í ensku úrvalsdeildinni í dag.

United var búið að vinna fjóra leiki í röð í öllum keppnum fyrir leikinn í dag en lærisveinum Luis van Gaal var snögglega kippt niður á jörðina.

Leikurinn var fremur rólegur en það dró til tíðinda á 26. mínútu þegar Juan Mata fékk að líta sitt annað gula spjald og þar með rautt fyrir brot á Darren Fletcher, fyrirliða West Brom og fyrrverandi leikmanni United.

Þrátt fyrir liðsmuninn ógnuðu heimamenn lítið, ekki fyrr en á 66. mínútu þegar Rondón skoraði eina mark leiksins með góðu skoti úr teignum eftir fyrirgjöf Sebastien Pocognoli frá vinstri. Þetta var sjöunda mark Venesúelamannsins á tímabilinu.

Fleiri urðu mörkin ekki og West Brom fagnaði góðum sigri sem skilar liðinu upp í 11. sæti deildarinnar.

United er enn í 6. sæti með 47 stig, þremur stigum frá Meistaradeildarsæti.

Mata fær rauða spjaldið West Brom 1-0 Man Utd