Newcastle ræddi við Benitez

Samkvæmt heimildum fréttavefs Sky Sports hafa forráðamenn Newcastle rætt við Rafa Benitez um að taka að sér starf knattspyrnustjóra félagsins.

Steve McClaren, núverandi stjóri, er sagður afar valtur í sessi og hefur verið fullyrt að hann verði látinn fara í vikunni.

Benitez var síðast stjóri Real Madrid en hann fór frá félaginu í janúar. Hann hefur áður þjálfað Liverpool, Chelsea, Napoli og Valencia.

Sjá einnig: Fullyrt að McClaren verði rekinn

Hans verkefni yrði að bjarga Newcastle frá falli en liðið situr í fallsæti eftir 3-1 tap fyrir Bournemouth um helgina. McClaren mun ekki sitja fyrir svörum blaðamanna á morgun eins og venja er fyrir leiki helgarinnar í enska boltanum en Newcastle á næst leik gegn toppliði Leicester á mánudagskvöldið.

David Moyes hefur einnig verið orðaður við stjórastöðuna hjá Newcastle en ljóst er að forráðamenn félagsins þurfa að bregðast skjótt við enda á liðið aðeins tíu leiki eftir af tímabilinu.