Elleray: Roy Keane var eflaust manna fegnastur þegar ég hætti

„Ég hef unnið mikið með íslenskum dómurum undanfarin 25 ár og mér þykir alltaf gaman að koma hingað,“ sagði David Elleray, fyrrum knattspyrnudómari, í samtali við Hörð Magnússon í kvöldfréttum Stöðvar 2 í gær. er

Elleray er hátt settur innan dómarahreyfingarinnar og hefur töluverð áhrif þegar kemur að reglubreytingum en hann er þessa dagana að aðstoða íslenska dómara í undirbúningi fyrir upphaf Íslandsmótsins.

„Marklínutækni hefur gengið vel því það sýnir svart á hvítu hvort þetta sé mark eða ekki. Það sýndi að tækni getur hjálpað okkur og spurningin er bara hvort það ætti að að hafa dómara sem getur skoðað atvikið betur með tækninni.“

Elleray sem lagði flautuna á hilluna árið 2003 dæmdi meðal annars leik Manchester United og Arsenal 1999 þegar Ryan Giggs skoraði sögufrægt mark þegar hann lék á hvern Arsenal-manninn á fætur öðrum.

Elleray rak Roy Keane af velli þann daginn en það var eitt af fjórum skiptum sem hann rak Keane af velli. Keane sendi honum treyju eftir að Elleray ákvað að leggja flautuna á hilluna.

„Hann var eflaust manna fegnastur þegar ég hætti,“ sagði Elleray léttur og bætti við: „Hann var ekki leikmaður sem var að gera eitthvað í leyni,“ sagði Elleray en viðtalið má sjá í spilaranum hér fyrir ofan.