Sport

Gunnar Nelson íþróttamaður ársins 2015 að mati lesenda Vísis

Tómas Þór Þórðarson skrifar
Gunnar Nelson er vinsæll á meðal Íslendinga.
Gunnar Nelson er vinsæll á meðal Íslendinga. vísir/getty
Gunnar Nelson, fremsti bardagamaður Íslands, var kosinn íþróttamaður ársins af lesendum Vísis annað árið í röð.

Lesendur Vísis stýrðu kosningunni algjörlega en þeir fengu tækifæri á að koma með tilnefningar og svo var Facebook-kosning á milli þeirra tíu sem fengu flestar tilnefningar.

Valið stóð á milli fimm karla og fimm kvenna úr átta íþróttagreinum. Rétt tæplega 10.000 manns tóku þátt í kosningunni og vann Gunnar öruggan sigur líkt og í fyrra.

Gunnar barðist tvisvar á árinu. Hann vann Bandaríkjamanninn Brandon Thatch í Las Vegas í júlí með hengingartaki í fyrstu lotu. Seinni bardaginn var ekki jafn góður en þar tapaði Gunnar fyrir Demian Maia, aftur í Las Vegas, á stigum.

„Mér finnst alveg ótrúlegt hvað ég fæ mikinn stuðning og ég finn það bara í samfélaginu þegar ég til dæmis fer niður í bæ á Þorláksmessu þar sem er mikið af fólki sem kemur og spjallar við mann,“ segir Gunnar um viðurkenninguna í viðtali við Vísi.

„Maður finnur fyrir meðbyrnum og hversu mikinn stuðning maður fær. Það er ekki hægt að lýsa því hversu þakklátur ég er fyrir þennan stuðning. Þó aðeins á móti blási fær maður samt svona kosningu. Þetta skiptir öllu,“ segir Gunnar Nelson.

Ítarlegt viðtal við Gunnar birtist á Vísi síðar í dag.

Niðurstaðan í kosningu Vísis:

1. Gunnar Nelson, MMA

2. Kristín Þorsteinsdóttir, íþróttir fatlaðra

3. Katrín Tanja Davíðsdóttir, CrossFit

4. Eygló Ósk Gústafsdóttir, sund

5. Fanney Hauksdóttir, kraftlyftingar

6. Gylfi Þór Sigurðsson, fótbolti

7. Aníta Hinriksdóttir, frjálsíþróttir

8. Guðjón Valur Sigurðsson, handbolti

9. Aron Einar Gunnarsson, fótbolti

10. Jón Arnór Stefánsson, körfubolti




Fleiri fréttir

Sjá meira


×