Ótrúlegt ferðalag á fyrstu dögunum: „Aldrei séð aðra eins fagmennsku“

Honum heilsast vel, litla drengnum þeirra Jóhönnu Sigfúsdóttur og Sveins Gunnars Guðmundssonar, sem fæddist á Neskaupstað á jóladag en hann upplifði meira á fyrstu dögum ævi sinnar en margir komast í gegnum á nokkrum árum.

Tveggja daga gamall þurfti hann að komast undir læknishendur í Reykjavík sem reyndist mikil svaðilför enda mikill veðurofsi víðsvegar um land. Þyrla Landhelgisgæslunnar var kölluð út til að sækja drenginn en aðstæður voru mjög erfiðar.

Sjá einnig: Þyrla flutti nýbura á Landspítalann eftir langt og strangt flug

Jóhanna og Sveinn Gunnar ræddu atburðarrásina í viðtali við héraðsmiðilinn Austurfrétt en fljótlega eftir fæðinguna, sem gekk hratt og vel, kom í ljós að að koma þyrfti nýfædda drengnum undir læknishendur í Reykjavík.

„Það er ekki óalgengt að nýburar séu latir að drekka og átti þetta því bara að ganga yfir,“ útskýrði Jóhanna í viðtalinu við Austurfrétt. „Þegar hann var tveggja daga gamall var ljóst að við þyrftum að fara með hann suður í nánara eftirlit.“

Við tók langt og strangt ferðalag en ekki var hægt að lenda sjúkraflugvél á Egilsstöðum og því var þyrla Landhelgisgæslunnar, sem var við leit að manni við Ölfusá, kölluð út.

Sjá má frétt Stöðvar 2 um björgunaraðgerðina hér fyrir neðan

 

Telja má ljóst að þyrluflugmenn Landhelgisgæslunnar hafi unnið þrekvirki í hættulegum sviptivindum þegar þeir komu fjölskyldunni litlu til hjálpar en þeir ræddu við fréttamann Stöðvar 2 um ferðalagið. Jóhanna fer fögrum orðum um starfsmenn Landhelgisgæslunnar.

Sjá einnig: Afi litla drengsins tók þátt í björgunaraðgerðum

„Við fundum ekki mikið fyrir veðrinu í þyrlunni, ég var búin að undirbúa mig fyrir mun verri ferð. Þeir hjá Landhelgisgæslunni eru algerir snillingar, buðu okkur bæði að borða og drekka, þetta var bara eins og á lúxushóteli,“ segir Jóhanna við Austurfrétt.

Fóru í gegnum ókláruð jarðgöng

Þyrlan gat ekki lent á Neskaupstað en náði að lokum að lenda á Breiðdalsvík um kvöldið. Ferðalagið frá Neskaupstað og að Breiðdalsvík tók um þrjá og hálfan tíma og kom pabbi Sveins Gunnars, Guðmundur H. Sigfússon slökkviliðsstjóri Fjarðarbyggðar, að ferðinni en þau fengu m.a. leyfi til að fara í gegnum hin nýju Norðfjarðargöng sem ekki eru fullkláruð.

„Veðrið var gersamlega kolvitlaust og sjúkrabíllinn fékk fylgd björgunarsveitarinnar í Neskaupstað í Norðfirði og gegnum nýju göngin, sem eru illfær,“ sagði Sveinn Gunnar við Austurfrétt. „Pabbi (Guðmundur H. Sigfússon, slökkviliðsstjóri Fjarðabyggðar) fylgdi okkur svo frá göngunum Eskifjarðarmegin og út að slökkvistöðinni á álverslóðinni.“

Sjá einnig: Líðan nýburans stöðug

Þar kom barnalæknir frá þyrlunni til móts við þau og þaðan fengu þau fylgd frá björgunarsveitarmönnum að þyrlunni. Við tók þriggja tíma flugferð til Reykjavíkur en þyrlan lagði af stað stað frá Breiðdalsvík klukkan 00.39 og lenti á Reykjavíkurflugvelli klukkan 03.17.

Aldrei séð aðra eins fagmennsku

Vel var tekið á móti Jóhönnu, drengnum nýfædda og móður Jóhönnu en svo óheppilega vildi til að Sveinn Gunnar fékk svæsna magapest kvöldið eftir fæðinguna og var því ákveðið að hann myndi ekki fara með í þyrlunni.

Rannsóknir leiddu í ljós að drengurinn var með bakflæði og er hann allur að braggast.

„Niðurstaðan var bakflæði sem er mjög algengt hjá ungabörnum og sérstaklega strákum, en það er eitthvað sem mun eldast af honum,“ sagði Jóhanna við Austurfrétt sem er mjög ánægð með þá þjónustu sem fjölskyldan litla fékk frá því að ljóst var að koma þyrfti drengnum suður.

„Ég hef aldrei séð aðra eins fagmennsku í einu og öllu og þar. Upplýsingaflæðið er ótrúlegt, þau vinna saman eins og vel smurð vél,“ sagði Jóhanna og undir þetta tók Sveinn Gunnar, „Við erum full þakklætis til allra þeirra sem að ferlinu komu á einn eða annan hátt. Það er alls ekki sjálfgefið að fá svo faglega og góða þjónustu í hverju horni,“ segir Sveinn að lokum.“

Lesa má viðtal Austurfréttar við Jóhönnu og Sveinn Gunnar í heild sinni hér.

Atburðarrás vegna þyrluflugs sunnudaginn 27.12. 2015:

09:53 Lögreglan á Suðurlandi óskar eftir þyrlu til leitar að manni sem talinn er hafa fallið í Ölfusá. Vegna mikilla anna flugdeildar frá deginum og kvöldinu áður var sammælst um að kalla út áhöfn á þyrlu á hádegi.

12:10 Áhöfn kölluð út vegna leitar við Ölfusá.

13:40 Flugtak á TF-SYN frá Reykjavík.

16:00 Beiðni um sjúkraflug í Neskaupstað kemur í gegnum Neyðarlínu i stjórnstöð Landhelgisgæslunnar. Ófært fyrir hefðbundna sjúkraflugvél.

16:00 Haft samband við TF-SYN. Beðnir að koma til Reykjavíkur og sækja sérhæfðan lækni og hjúkrunarfræðing og viðeigandi búnað vegna sjúkraflugs á Neskaupstað.

16:16 Lending TF-SYN í Reykjavík. Áhöfn fer í að undirbúa sjúkraflug á TF-GNÁ.

17:32 Flugtak TF-GNÁ frá Reykjavík. Vindhraði 12-15 m/s úr suð-austri og rigning. Flogið í 4000 feta hæð að Þorlákshöfn og þaðan ströndinni fylgt áleiðis til Hornafjarðar.

19:35 Lending á Hornafirði. Takið eldsneyti.

20:15 Flugtak Hornafirði. Haldið áleiðis úti fyrir ströndinni til Neskaupstaðar. Upplýsingar frá Neskaupstað gáfu til kynna að aðstæður væru erfiðar og óvíst með lendingarstað vegna hálku, hvassviðris og sviptivinda.

20:35 Úti fyrir Hvalnesi. Vindur 20 m/s úr suðri og úrkoma.

21:00 Flogið yfir Neskaupstað og flugvöllinn á Neskaupstað og athugað með mögulegan lendingarstað. Sviptivindar og allt að 35 m/s vindhraði. Ófært að lenda.

21:11 Haldið út Norðfjörð og þaðan suður um. Athuga með mögulega lendingu á Stöðvarfirði. Vegna lélegs skyggnis ekki hægt að lenda á Stöðvarfirði.

21:46 Lent inn í Bænum á Breiðdalsvík. Vindur stöðugur úr suð-austri. Haft samband við Neskaupstað og látið vita um að þyrlan væri lent. Athuga með hvort fært væri landleiðina til Breiðdalsvíkur. Læknir og hjúkrunarfræðingur halda til móts við sjúkling landleiðina.

00:39 Flugtak frá Breiðdalsvík. Suð-austan 10-15 m/s vindur og rigning.

01:14 Lending á Hornafirði. Eldsneytistaka framkvæmd án þess að slökkt væri á mótorum.

01:29 Flugtak frá Hornafirði. Flogið meðfram ströndinni að Þorlákshöfn.

03:00 Flug hækkað í 4000 fet við Þorlákshöfn.

03:17 Lending á Reykjavíkurflugvelli.