Vilja koma í veg fyrir massatúrisma

Snæfellsbær vinnur nú með með þær hugmyndir að takmarka aðgengi að náttúruperlum í sveitarfélaginu til að tryggja vernd þeirra og koma í veg fyrir of mikinn ágang ferðamanna. Hugmyndirnar eru liður í vinnu sveitarfélagsins að nýju aðalskipulagi sem á að taka gildi vorið 2017.

Straumur ferðamanna út á Snæfellsnes hefur aukist verulega á síðustu fimm árum og býst Kristinn Jónasson, bæjarstjóri Snæfellsbæjar, við að þeir verði 500 þúsund í ár.

„Við viljum helst geta tekið á móti sem flestum, en þá verðum við að gera það með skipulagi. Með því teljum við okkur ekki vera að gera annað en að passa náttúruna fyrst og fremst og einnig að passa að þeir sem koma til okkar fái ánægjulega upplifun á svæðinu. Það skiptir mestu máli,“ segir Kristinn sem segir að heimamenn vilji forðast örtröð á ferðamannastöðum sem sumir hafa uppnefnt „massatúrisma“.

Kristinn segir að ýmsar hugmyndir hafi komið fram til að ná þessum markmiðum. Hann nefnir sem dæmi mögulegt bann á stórar rútur á sumum stöðum, setja stærðartakmarkanir á þær og einnig hvort rafmagnsbílar skuli nýttir til að flytja fólk að náttúruperlu frá bílastæðum. Hann leggur áherslu á að Snæfellsbær vilji áfram vera í góðu samstarfi við ferðaþjónustuaðila. „Við viljum þó gera þetta á okkar forsendum, það er aðalatriðið,“ segir Kristinn og bendir á að þessi áhersla sé í samræmi við Earth Check umhverfisvottunina sem Snæfellsnes hlaut árið 2008.

„Í okkar huga skiptir miklu máli að dreifa ferðamönnum þannig að það séu ekki að koma 500 þúsund manns á einn stað. Við viljum heldur koma því þannig fyrir að fólk sé að koma líka á aðra staði hjá okkur,“ segir Kristinn.

„Við ætlum að gera hlutina eins og við teljum best fyrir náttúruna, samfélagið og Ísland í heild sinni.“

Fréttin birtist fyrst í Fréttablaðinu