Lögreglan varar við fentanýl

Lögreglan á höfuðborgarsvæðinu minnir á að notkun verkjalyfsins fentanýl skuli ávallt vera í samráði við lækni. Þetta kemur fram í tilkynningu frá lögreglunni.

„Fentanýl er mjög sterkt verkjalyf og getur valdið dauða hjá þeim sem kunna ekki með það að fara. Fjölmörg dauðsföll á Norðurlöndunum eru rakin til notkunar á fentanýl, en lögreglan rannsakar nú andlát ungs manns á höfuðborgarsvæðinu um síðustu helgi þar sem grunur leikur á að umrætt lyf hafi komið við sögu.

Lögreglan hefur jafnframt áhyggjur að fentanýl kunni að ganga hér kaupum og sölum í formi dufts, kristalla og taflna. Vitað er að fentanýl er boðið til sölu á netinu hjá aðilum í Asíu og Suður-Ameríku. Lögreglan ítrekar að fentanýl er mjög sterkt verkjalyf og því stórhættulegt í höndum þeirra sem kunna ekki með það að fara og á einvörðungu að nota í samráði við lækni.“

Lögreglan vill einnig vekja athygli á umfjöllun um lyfið frá embætti landlæknis annars vegar og Lyfju hins vegar.

Þá hefur lyfjastofnun einnig birt ítarlegar upplýsingar um fentanýl ætlaðar almenningi. Þær upplýsingar má nálgast hér.