Rapparinn Gísli Pálmi Sigurðsson beitti skyndihjálp á vin sinn er hann missti meðvitund í porti við spilastofuna Fredda í Þingholtsstræti í miðbæ Reykjavíkur aðfaranótt sunnudags. Töluvert hefur verið fjallað um mál tveggja manna en annar missti meðvitund aðfaranótt sunnudags og hinn lét lífið á heimili sínu nokkru síðar.

Lögreglan á höfuðborgarsvæðinu rannsakar bæði málin en grunur leikur á að lyfið fentanýl hafi komið við sögu í báðum tilfellum. Samkvæmt upplýsingum frá lögreglunni á höfuðborgarsvæðinu er rannsóknin langt á veg komin. Beðið er eftir niðurstöðum úr eiturefnarannsókn. Þá á eftir að yfirheyra nokkur vitni.

Mennirnir, sem fæddir eru árið 1990 og árið 1992, þekktust og höfðu verið á skemmtistað í miðbæ Reykjavíkur með félögum sínum um kvöldið. Að sögn heimildarmanna Fréttablaðsins þekkti Gísli Pálmi báða mennina en hann var með tónleika umrætt kvöld. Sá sem missti meðvitund var á sviði með Gísla Pálma á tónleikunum en hann hefur lengi verið partur af teyminu hans.

Að sögn sjónarvotta sem Fréttablaðið ræddi við beitti Gísli Pálmi skyndihjálp á vin sinn er hann missti meðvitund. Sjúkraliðar komu á staðinn stuttu síðar og var maðurinn fluttur á slysadeild.

Tvö dauðsföll í ár má rekja til fentanýls að frátöldu atviki um síðustu helgi. Fentanýl er rótsterkt lyfseðilsskylt verkjalyf sem selt er í plástraformi. Það er skylt morfíni en er hundrað sinnum sterkara og fimmtíu sinnum sterkara en heróín. Lyfið hefur slævandi áhrif og er ávanabindandi. Þeir sem misnota lyfið bræða plástrana og reykja þá eða sprauta efnunum í sig. Lyfið er ætlað fólki sem glímir við langvinna verki og er til að mynda notað af krabbameinssjúklingum við verkjum, sem og við líknandi meðferð.

Misnotkun fentanýls hefur færst í aukana undanfarið og þá sérstaklega í Bandaríkjunum þar sem rekja má tugi dauðsfalla til notkunar lyfsins síðustu mánuði. Umræðan komst í hámæli þegar greint var frá því að poppstjarnan Prince hefði látist af ofneyslu fentanýls í maí síðastliðnum.

Ekki náðist í Gísla Pálma við vinnslu fréttarinnar þrátt fyrir ítrekaðar tilraunir.

Fréttin birtist fyrst í Fréttablaðinu.