Hrókeringar í ríkisstjórn Noregs

Norskir fjölmiðlar greina frá því að breytingar verði gerðar í ráðherraliði Noregs, en tilkynnt var í gær að tveimur ráðherrum úr röðum Framfaraflokksins verði skipt út.

Norski dómsmálaráðherrann Anders Anundsen og olíu- og orkumálaráðherrann Tord Lien munu yfirgefa ríkisstjórnina, en í þeirra stað koma þeir Per-Willy Amundsen og Terje Søviknes.

Þeir Anundsen og Lien hafa átt sæti í ríkisstjórn Ernu Solberg, allt frá því að hún tók við völdum í október 2013.

Í frétt NRK segir að hrókeringarnar komi sumpart ekki á óvart þar sem Anundsen hafi greint frá því í sumar að hann hugðist láta af ráðherradómi. Þá hefur hann lýst því yfir að hann sækist ekki eftir endurkjöri til norska þingsins. Hann hefur sætt nokkurri gagnrýni vegna orða um að hann vilji senda hælisleitendur á barnsaldri úr landi.

Amundsen er þingmaður Troms og var lengi talsmaður Framfaraflokksins í málefnum innflytjenda. Hann var fyrst kjörinn á þing árið 2005 og hefur meðal annars sagst vera efasemdamaður í umræðunni um loftslagsmál.

Búist er við að greint verði formlega frá ráðherrabreytingunum á morgun.

Hægriflokkur Solberg og Framfaraflokkurinn mynda saman minnihlutastjórn í Noregi, en stjórnin nýtur stuðnings Frjálslynda flokksins og Kristilega þjóðarflokksins.