Kane: Við getum náð Leicester

Tottenham styrkti stöðu sína í titilbaráttunni á Englandi með 4-0 sigri á Stoke á útivelli í kvöld. Harry Kane og Dele Alli skoruðu tvö mörk hvor fyrir Tottenham.

„Þvílík frammistaða! Það er erfitt að koma hingað til stoke og þessi sigur sýnir hversu sterkt lið við erum með. Við erum ekki að fara neitt,“ sagði Kane eftir leikinn í kvöld. „Við skoruðum fjögur mörk en þau hefðu getað orðið sex eða sjö. Þetta var ein besta frammistaða okkar á tímabilinu.“

Leicester tapaði stigum gegn West Ham í gær og Kane sagði að hann hafi átt erfitt með að bíða eftir leiknum í kvöld.

„Þetta verður ekki mikið betra. Við stigum vart feilspor og hver einasti leikmaður átti góðan leik. Þetta höfum við verið að gera að undanförnu og við erum tilbúnir í að setja pressu á Leicester. Við teljum að við getum gert þetta.“