Vagnstjórar Strætó hætta að selja farmiða

Frá og með 1. janúar 2016 verða ekki lengur seldir farmiðar hjá vagnstjórum Strætó á höfuðborgarsvæðinu. Ástæðan er dvínandi eftirspurn í vögnunum og aukin áhersla á rafræn fargjöld en frá og með næstu viku verður hægt að kaupa eins-mánaðar kort í Strætó-appinu.

Í samtali við Vísi sagði Jóhannes Svavar Rúnarsson, framkvæmdastjóri Strætó, að sala á farmiðum hjá vagnstjórum hefði dregist mikið saman og í dag heyrði það til undantekninga ef vagnstjórar seldu farmiða.

Í takt við það að leggja á aukna áherslu á rafræn fargjöld hyggst Strætó bjóða upp á að hægt verði að kaupa hin svokölluðu tímabilskort í Strætó-appinu. Fyrst um sinn verður hægt að kaupa eins-mánaðar kort fyrir höfuðborgarsvæðið með appinu.

Býst Jóhannes við að það verði hægt frá og með næstu viku en þegar fram líða stundir verður hægt að kaupa hinar útgáfurnar af tímabilskortunum ásamt kortum fyrir landsbyggðina. Farmiðar verða áfram seldir hjá tæplega 30 söluaðilum Strætó víðs vegar á höfuðborgarsvæðinu, gegnum heimasíðu Strætó og í Strætó appinu.