Orkuveitan krafðist endurgreiðslu vegna „óásættanlegrar“ ráðgjafar

„Helsta ástæða fyrir hækkun kostnaðaráætlunar eru óvönduð vinnubrögð af hendi ráðgjafa við gerð upphaflegu kostnaðaráætlunarinnar,“ segir í minnisblaði til forstjóra Orkuveitu Reykjavíkur vegna hækkunar á kostnaði við Hverahlíðarlögn.

Fram kemur í minnisblaðinu að áætlað hafi verið í janúar 2014 að kostnaður við gufulögn frá Hverahlíð til Hellisheiðarvirkjunar yrði rúmir 2,6 milljarðar. Hálfu ári síðar hafi áætlaður kostnaður verið orðinn 639 milljónum króna hærri, eða nærri 3,3 milljarðar.

„Ítrekuð mistök við áætlanagerð í þessu verki eru að mati ON óásættanleg og bera ráðgjafar ábyrgð á þeim, bæði faglega og fjárhagslega,“ segir í bréfi Páls Erland, framkvæmdastjóra Orku náttúrunnar (ON), dótturfélags OR, til ráðgjafarfyrirtækisins Mannvits.

„Það tilkynnist hér með,“ heldur Páll áfram, „að ON hefur tekið ákvörðun um að fara fram á að ráðgjafar endurgreiði þann kostnað sem ON hefur þegar greitt fyrir vinnu vegna ófullnægjandi kostnaðaráætlana sem ON fékk frá ráðgjöfum og voru unnar á árunum 2013 og 2014.“

Þá rekur Páll að ráðgjafar hafi við gerð síðustu kostnaðaráætlunar þar á undan sagt hönnunarkostnað verða um 232 milljónir króna. „Nú nokkrum mánuðum síðar og án þess að stórkostlegar breytingar hafi orðið á verki er kynnt að ráðgjafar muni krefja ON um 310.832.120 krónur,“ segir framkvæmdastjórinn sem kveður ON eingöngu tilbúið að greiða fyrir aukaverk sem nemi 10 prósentum ofan á kostnaðaráætlun. Það myndi þýða 23 milljóna viðbótargreiðslu í stað um 79 milljóna.

Ekki náðist í Pál í gærkvöld en í bréfinu sem dagsett er 3. nóvember gefur hann lítið fyrir skýringar Mannvits sem þá höfðu borist. „Kemur fram að um mistök sé að ræða sem helst megi skýra með sumarfríi, afleysingum og reynsluleysi starfsmanna ráðgjafa.“

Sigurhjörtur Sigfússon, framkvæmdastjóri Mannvits, segir málið nú leyst en vill ekki upplýsa í hverju lausnin felst. „Við erum mjög fagleg í því sem við gerum og stöndum fast í því sem við erum að gera.“