Topp 10 vinsælustu fegrunaraðgerðirnar á Íslandi

Nóvemberútgáfan af Glamour kemur í verslanir í dag en þar er meðal annars fjallað um vinsælustu fegrunaraðgerðirnar á Íslandi.

Í blaðinu fræðir Þórdís Kjartansdóttir, lýtalæknir, lesendur Glamour um heim bótox, brjóstastækkana og andlitslyftinga.

Hér að neðan má sjá topp 10 lista yfir vinsælustu fegrunaraðgerðirnar á Íslandi en um er að ræða óformlegan lista frá Þórdísi. Nánar er rætt við Þórdísi í nýjasta tölublaði Glamour. 

1. Bótox

Sjö ár eru síðan byrjað var að nota bótox á Íslandi í fegrunarlækningum. Það er ekki spurning að vinsældir þess hafa farið ört vaxandi. Bótox er lyf sem sprautað er undir húðina og slakar staðbundið á undirliggjandi vöðvum sem gerir það að verkum að hrukkur minnka. Notað á réttan hátt er hægt að kalla bótox yngingarmeðal. Áhrif bótox endast í um 6 mánuði en því oftar sem það er notað dugar það lengur.

Algengasti aldurshópur, meðal karla og kvenna, er 35-55 ára.

2. Fyllingarefni

Þetta er einnig meðferð þar sem takmarkið er að minnka hrukkur. Tilbúnu fyllingarefni (hyaluronic acid) er sprautað undir húðina. Algengasta staðsetningin er hrukkurnar meðfram munni í áttina að höku og frá nefi niður að munni. Fyllingarefni er líka notað til þess að gera varir bústnari. Það er kúnst að nota fyllingarefnið og flestir vilja að það sé sem náttúrulegast. Mikilvægt er að fylliefnið sem er notað sé uppleysanlegt, en algengur endingartími er um 1 ár.

3. Augnlokaaðgerðir

Þetta er algengasta skurðaðgerðin og það þykir almennt ekki mikið tiltökumál að fara í augnlokaaðgerð í þjóðfélaginu. Tilgangur hennar er ekki einungis að líta betur út heldur getur fólki líka almennt liðið betur. Fólk upplifir stundum að þurfa að lyfta augabrúnunum ef augnlokin eru þung og fá við það þreytu og höfuðverk. Þessi aðgerð opnar augnsvæðið og fólki getur liðið betur. Eins er mun þægilegra fyrir konur að mála sig á augnsvæðinu.

4. Brjóstastækkun

Silíkonpúðar eru notaðir til brjóstastækkunar. Oftast er gerður skurður hliðlægt undir brjóstið til þess að koma púðanum fyrir. Púðinn er síðan settur annaðhvort undir eða yfir brjóstvöðvann. Aðgerðin er gerð í svæfingu og tekur um klukkustund.

Algengasti aldurshópurinn er undir 45 ára.

5. Fitusog

Fitusog er ekki megrunaraðgerð en er notað til að leiðrétta staðbundna fitudreifingu á óheppilegum stöðum. Algengustu svæði geta verið; framan á kvið, mjaðmir, háls, utan- og innanverð læri, hné og upphandleggir. 

6. Svunta

Aðgerð sem er gerð til að fjarlægja slappa og hangandi húðfellingu framan á  kviðnum, oftast tengist það meðgöngu eða þyngdartapi. Fitusog á mjöðmum er oftast framkvæmt samhliða aðgerðinni.



7. Skipting á púðum

Mælt er með að skipta um eldri tegundir af púðum eftir 10 ár. Púðar sem notaðir eru í dag eru með ævilanga ábyrgð frá framleiðanda. Það getur samt komið rof á himnuna utan um silíkonið (1 prósent kvenna á 8 ára tímabili) og er nauðsynlegt fyrir konur að láta fylgjast með sér. En brjóst breytast samt oft með tímanum og konur vilja stundum skipta um púða þrátt fyrir að þeir séu heilir. Ástæðurnar geta verið slöpp brjóst eftir brjóstagjöf, þyngdartap o.s.frv.

8. Brjóstaupplyfting án púða

Hér eru brjóstunum lyft upp, geirvartan færð ofar og húðin strekkt umhverfis kirtilinn sem oft er aðeins minnkaður. Það er algengur misskilningur að þegar ör er umhverfis geirvörtuna hafi hún verið tekin af og sett á aftur. Einungis ysta lag húðarinnar er tekið af og geirvartan færð ofar á brjóstið. Mjólkurgangar haldast oftast óskaddaðir og yfirleitt er hægt að hafa barn á brjósti.

9. Brjóstaupplyfting með púðum

Ef brjóstin eru mjög „tóm“ og kirtilvefur er lítill er oftast mælt með að setja púða um leið og þeim er lyft. Ör eru umhverfis og undir vörtubaug og yfirleitt í brjóstafellingunni undir brjóstinu. Betri fylling helst ofan á brjóstinu ef púði er settur um leið og brjóstaupplyfting er framkvæmd.



10. Andlitslyfting

Hér er strekkt á húð og undirhúð andlits og háls með skurði frá hársverði niður framan við eyru og aftur fyrir eyrun. Tilgangurinn er að slétta húð og minnka hrukkur. Húðin missir teygjanleika sinn með aldrinum og eru svæðin í kringum augu og enni viðkvæmust.