Löggan í Eyjum fær ekki að leita að barnaklámi hjá meintum dónakarli

Hæstiréttur hefur staðfest úrskurð Héraðsdóms Suðurlands þess efnis að lögreglan í Vestmannaeyjum fái ekki heimild til að leita á heimili eldri manns á Heimaey. Telja dómstólarnir að ekki hafi verið sýnt fram á að rökstuddur grunur væri um að maðurinn hefði framið brot sem líklegt væri að hann yrði ákærður fyrir.

Málið má rekja til fréttar DV frá 26. október þar sem upplýst var að íbúi á Heimaey hefði á Facebook-síðu sinni myndaalbúmið „Stelpurnar í bænum“. Þar mátti sjá myndir af táningsstelpum á leið heim úr skóla. Lögreglan fékk ábendingu um hver umræddur maður væri og skoðaði umrædda Facebook-síðu.

Þar hafi verið að finna mjög mikið magn af ljósmyndum og myndböndum sem sýndu fáklæddar ungar konur í kynferðislegum stellingum. Þá hafi einnig mátt sjá myndir af ungum konum eða stúlkum á gangi og hafi litið svo út sem myndirnar hefðu verið teknar án þeirra vitundar. Hafi tvær stúlknanna verið nafngreindar.

Búið að fjarlægja myndir og myndbönd

Með vísan til eðli myndanna hafi grunur vaknað um að kærði gæti haft undir höndum ólöglegt efni, svo sem barnaklám. Þegar lögregla hafi ætlað að taka afrit af myndunum hafi verið búið að fjarlægja allar upplýsingar á Fésbókarsíðu kærða, þar á meðal fyrrnefndar myndir og myndbönd.

„Lögregla telur miklar líkur á því að kærði hafi undir höndum ólöglegt efni sem sýni konur og börn á kynferðislegan og klámfenginn hátt. Rannsókn málsins sé á frumstigi en lögreglu sé nauðsynlegt að fá heimild til húsleitar svo leggja megi hald á tölvubúnað kærða og annan búnað svo rannsókn geti hafist á því hvort að um ólöglegt efni sé að ræða. Til að tryggja rannsóknarhagsmuni og að sakargögnum verði ekki spillt sé lögreglu nauðsynlegt að fá framangreinda heimild,“ segir í greinargerð lögreglu. Ætluð brot geta varðað allt að tveggja ára fangelsi.

Þar sem lögregla gat ekki lagt fram nein gögn sem bentu til þess að maðurinn hefði undir höndum ólöglegt efni, svo sem barnaklám, taldi héraðsdómur ekki að lögreglustjóri hefði sýnt fram á um rökstuddan grun sem gæti leitt til ákæru. Var beiðninni því hafnað. Hæstiréttur staðfesti þá niðurstöðu í gær.