Vonast til að mál sitt verði fordæmi

„Það er mjög gott að fá þessa möguleika,“ segir kvensjúkdómalæknirinn Liana Belinska, sem hefur lengi átt sér þann draum að fá að starfa sem læknir hérlendis. Nú eru meiri líkur en áður á að draumurinn verði að veruleika.

Fréttablaðið sagði sögu Liönu í nóvember síðastliðnum en hún er menntaður kvensjúkdómalæknir frá heimalandi sínu, Úkraínu en eftir að hún kom hingað til lands hefur hún ekki fengið menntun sína metna, þrátt fyrir ítrekaðar tilraunir til þess.

Eftir umfjöllunina hefur hins vegar þokast til í málum Liönu. Fréttablaðið sagði frá því í janúar að Jón Þór Ólafsson, þingmaður Pírata, hefði ákveðið að kanna málið og farið á fund forseta læknadeildar Háskóla Íslands.

Áður hafði Liana fengið vilyrði fyrir því að komast inn í læknadeildina og taka síðustu þrjú ár læknanámsins gegn því að standast inntökupróf inn í deildina. Það vildi hún hins vegar ekki þar sem inntökuprófið miðar að einhverju leyti að almennri þekkingu Íslendinga sem hún taldi sig ekki búa yfir þar sem hún hefði lært erlendis. Liana fór svo á fund læknadeildar Háskóla Íslands í lok janúar og fékk þá uppgefna nokkra kosti til þess að geta komist inn í námið.

„Þeir sögðu að ég gæti farið í mastersnám í lýðheilsu, ég skoðaði það en það er meiri svona rannsóknarvinna og litlir atvinnumöguleikar þannig að ég vil ekki gera það,“ segir hún.

„Önnur leiðin sem þeir buðu mér var að taka inntökupróf og endurtaka þrjú ár. Þeir ætla að undirbúa öðruvísi próf fyrir mig sem tengist meira því sem ég var að læra á fyrstu þremur árunum í náminu. Ég má síðan taka amerískt próf sem allir stúdentar taka áður en þeir fara á kandídatsár. Ef ég næ 50% af prófinu þá get ég farið beint í þjálfun í fimm mánuði og svo á kandídatsár, ef ég næ 70% eða meira þá fer ég beint á kandídatsár,“ segir Liana.

Hún býr sig nú undir að taka prófið líklega í maí og fær hjálp frá konu sem er nýútskrifuð sem læknir hér á landi. Hún ætlar auk þess að athuga hvort það sé möguleiki á að fá að fylgjast með á einhverri deild spítalans í nokkra daga til þess að læra á kerfið þar sem það er orðið nokkuð langt síðan hún starfaði sem læknir. „Ég ætla að prófa taka prófið í maí. Aðallega til að sjá hvernig það er og ef ég næ því ekki þá tek ég það bara aftur,“ segir hún vongóð.

Liana vonast til þess að hennar mál setji fordæmi fyrir aðra innflytjendur sem reyna að fá menntun sína metna hérlendis. „Það væri mjög gott, ég skil ekki af hverju ég gat ekki fengið þessa möguleika fyrr en ég er ánægð með að það sé loksins eitthvað að gerast.“