Smygluðu 300 áfengisflöskum, 2000 neftóbaksdósum og 1500 sígarettupökkum

Tveir karlmenn hafa játað smygl á 300 áfengisflöskum, 2000 neftóbaksdósum og 1500 sígarettupökkum. Lögreglan á Suðurlandi greinir frá þessu á Facebook-síðu sinni í dag þar sem hún fer yfir verkefni síðastliðinnar viku.

Lögreglan stöðvaði för mannanna síðdegis síðastliðinn þriðjudag við Víki í Mýrdal. Voru þeir á Pajero-jeppa en það vakti athygli lögreglumannanna hve mikill varningur var í jeppanum sem var á suðurleið.

Við nánari skoðun kom í ljós að um var að ræða talsvert magn af áfengi og tóbaki og segir lögreglan að strax hafi vaknað sá grunur að um smyglvarning væri að ræða. Tveir menn sem voru í jeppanum voru handteknir og færðir til yfirheyrslu. Í framhaldi var einn handtekinn á höfuðborgarsvæðinu sem talinn var að tengjast málinu. Við yfirheyrslur viðurkenndu tveir mannanna að hafa smyglað áfenginu og tóbakinu í land á Reyðarfirði. Lögreglan lagði hald á um 300 áfengisflöskur, um 2000 neftóbaksdósir og um 1500 sígarrettupakka. Segir lögreglan að verið sé að ganga frá málinu til afgreiðslu til ákærusviðs lögreglustjórans á Suðurlandi.

Flatskjá var stolið úr sumarbústað við Suðurheiðarveg í Grímsnesi á tímabiliinu frá 16. október til 13. nóvember síðastliðinn. Eigendur bústaðarins höfðu ekki komið í húsið í tæpan mánuð. Málið er óupplýst.

Tvö fíkniefnamál komu upp í síðustu viku. Ökumaður sem var stöðvaður á Eyrarbakkavegi hafði í fórum sínum fjórar jónur og eina kúlu af hvítu dufti. Auk þess var hann grunaður um að vera undir áhrifum fíkniefna við aksturinn. Í Þorlákshöfn voru höfð afskipti af konu vegna gruns um að hún hefði í vörslum sínum fíkniefni. Við leit fundust hjá henni um 3 grömm af kannabis ásamt neyslutólum.

Lögreglan á Suðurlandi segist hafa verið undir miklu álagi undanfarna daga vegna fjölda umferðaróhappa í kjölfar mikillrar hálku á vegum einkum í uppsveitum Árnes- og Rangárvallasýslu. Skráð voru 20 óhöpp og slys en engin þó alvarleg. Segir lögreglan að í flestum tilvikum þurfi að kalla til lögreglu og sjúkralið og stundum um langan veg að fara.