Aldraðir með D-vítamín skort tvöfalt líklegri til að verða þunglyndir

Karlar, 66 ára og eldri, sem þjást af D-vítamín skorti eru tvöfalt líklegri en aðrir eldri borgar til að verða þunglyndir.  Þetta segir í niðurstöðum nýrrar rannsóknar sem kynnt var á ráðstefnu um rannsóknir í líf- og heilbrigðisvísindum í Háskóla Íslands og náði til ríflega 5 þúsund Íslendinga á aldrinum 66 til 96 ára. Um 6 prósent eldri karla með D-vítamín skort eiga í hættu á að verða þunglyndir miðað við 3 prósent þeirra sem hafa eðlilegt gildi D-vítamíns í blóði.

Cindy Mari Imai, nýdokor í næringafræði við Háskóla Íslands og einn rannsakenda, segir að lýsi gæti hjálpað til í baráttunni gegn D-vítamín skorti og þar að leiðandi þunglyndi. Karlarnir í rannsókninni sem tóku lýsi hafi mælst með hærra D-vítamín gildi en þeir sem ekki gerðu það. Hún ráðleggur öllum Íslendingum að taka inn D-vítamín en eldriborgum að gera það sérstaklega enda sé  ráðlagður dagskammtur eldri borgara af D-vítamíni hærri en annarra.

Þarf að veita eldra fólki félagslegan stuðning

Þá hafi rannsóknin ekki sýnt fram á með óhyggjandi hætti hvort D-vítamín skortur í konum auki líkur á þunglyndi. Það sé í andstöðu við niðurstöðu erlendra rannsókna. Þær hafi almennt gefið til kynna að konur með D-vítamín skort séu líklegri en karlar til að þjást af þunglyndi. Cindy segir þó að konurnar í íslensku rannsókninni hafi almennt tekið lýsi og mælst með há D-vítamín gildi.

Þó segir Cindy vandamálið ekki bara eiga við um D-vítamín inntöku. „Þetta er lífstílsvandamál.  Þeir sem þjáðust af D-vítamín skorti voru líklegri til að hreyfa sig minna og líklegri til að reykja. Auk þess að skoða D-vítamín gildi í eldri borgurum þarf að veita þeim félagslegan stuðning,“ segir hún.

Þunglyndi meðal eldri borgara mun aukast á næstu árum

Cindy á von á að þunglyndi meðal eldri borgara aukist á næstu árum. „Þetta vandamál mun aukast því Íslendingar lifa sífellt lengur og þá má búast við því að tíðni þunglyndis aukist að sama skapi. Sérstaklega vegna þess að sólin skín fremur stutt flesta mánuði ársins. Þegar Íslendingar eru úti þá eru þeir yfirleitt kappklæddir svo þeir taka inn fremur lítið D-vítamín upp í gegnum húðina,“ segir Cindy.