Sigrún tók við lyklunum að ráðuneytinu

Sigurður Ingi Jóhannsson afhenti Sigrúnu Magnúsdóttur lyklana að umhverfis- og auðlindaráðuneytinu klukkan ellefu í dag.

Lyklaafhendingin fór fram á skrifstofu ráðherra í umhverfis- og auðlindaráðuneytinu að Skuggasundi 1 í Reykjavík.

Sigmundur Davíð Gunnlaugsson, forsætisráðherra, lagði fram þá tillögu fyrir þingflokksfund Framsóknarflokksins þann 30. desember að Sigrún Magnúsdóttir, þingmaður flokksins í Reykjavík og formaður þingflokksins, verði nýr ráðherra flokksins.

Sigurður Ingi hefur verið yfir atvinnuvega- og nýsköpunarráðuneytinu en í framhaldinu verður hann aðeins sjávarútvegsráðherra- og landbúnaðarráðherra.