Zlatan: Það var mikil hvatning að mæta uppeldisfélaginu

Zlatan Ibrahimovic mætti Kára Árnasyni og félögum í Malmö í Meistaradeild Evrópu í fótbolta í gærkvöldi þegar PSG tók á móti sænsku meisturunum.

Zlatan er fæddur og uppalinn í Malmö, en það stóð tæpt að hann gæti mætt sínu gamla félagi vegna meiðsla í kviðvöðva.

Hann gerði allt hvað hann gat til að vera klár í leikinn, en hann er elskaður og dáður hjá stuðningsmönnum Malmö sem geta ekki beðið eftir því að hann spili seinni leikinn í Svíþjóð.

„Það var mér mikil hvatning að mæta uppeldisfélaginu Malmö þar sem allt byrjaði hjá mér,“ sagði Zlatan eftir leikinn í gærkvöldi.

„Ég náði ekki að skora en mig skortir líka leikform. Það var samt mikilvægt fyrir okkur að byrja á sigri því nú erum við strax komnir í fína stöðu,“ sagði Zlatan Ibrahimovic.