Segir lögreglumenn úrkula vonar

Eftir þrjátíu ár af niðurskurði og vanefndum eru lögreglumenn úrkula vonar. Starfsumhverfi lögreglunnar hefur verið jafnt og þétt á niðurleið árum saman. Þetta segir lögreglumaður til þriggja áratuga.

Bjarni Ólafur Magnússon hefur verið lögreglumaður í þrjátíu og tvö ár og hefur víðtæka reynslu af starfssviðum hennar. Allt frá starfi hins almenna lögreglumanns, til sérsveitar ríkislögreglustjóra og kennslu verðandi lögreglumanna.

Bjarni greinir frá reynslu sinni í aðsendri grein í Morgunblaðinu þar sem hann lýsir starfsumhverfi lögreglumannsins, hinu mikla andlega álagi, niðurskurði og þrálátri fáliðun lögreglunnar á sama tíma og verkefnum af öllum toga fjölgar.

Hann segir stórfelldar breytingar hafa átt sér stað á síðust áratugum. Þetta séu breytingar sem komi niður á lögreglumönnum og almennum borgurum.

„Á þeim tíma gat maður farið í gegnum vakt án þess að vera orðinn úrvinda af þreytu, maður hafði tíma til að vinna skýrslur. Maður hafði tíma til að ræða málin við félaga. Maður hafði tíma fyrir þennan félagslega þátt, sem var og er afar mikilvægur,“ segir Bjarni. „Þetta er eiginlega úr sögunni.“

Í nýlegri skýrslu greiningardeildar ríkislögreglustjóra kemur fram að nú telji lögreglan á Íslandi sig ekki vera færa um að halda uppi ásættanlegri frumkvæðislöggæslu vegna fjárskorts og manneklu og erfitt sé að viðhalda öryggisstigi á landsbyggðinni.

„Á sama tíma ertu að tala helmingi stærrra varðsvæði, miklu alvarlegri og erfiðari brot. Miklu meiri kröfur um fagþekkingu. Allt þetta gerir okkur, og þá er ég að tala um þennan heildstæða aðbúnað, ofboðslega slæman.“

Bjarni  segir málafjölda lögreglu slíkan að ómögulegt sé að sinna þeim öllum.

„Í rannsóknardeild lögreglunnar, þar er hver rannsakandi ofhlaðinn af málum. Það þarf að forgangsraða. Það þarf, eins og við köllum það, að slátra málum. Mál sem jafnvel geta verið að vega þungt á þolandann. En við höfum hreinlega ekki mannafla eða tíma til að vinna úr öllum málum.“

Þannig séu það ekki aðeins kjaramál útskýra það að fjöldi lögreglumanna hætti á að fara á svig við lög og hringja sig inn veika á föstudaginn, með tilheyrandi röskunum á starfi lögreglunnar.

„Á þessum síðustu 30 árum þá hefur þetta verið jafnt og þétt á niðurleið. Og þegar ég tala um niðurleið þá er ég að tala um hvernig skorið hefur verið niður í röðum lögreglumanna sem eru til staðar til að sinna öryggi borgaranna. Til að sinna hagsmunum borgara,“ segir Bjarni og bætir við: „Ég held að þetta snúist ekki bara um það að menn séu búnir að fá endanlega nóg, heldur það að menn séu líka orðnir úrkula vonar.“